روس میں پرکشش ملازمتوں اور اعلیٰ تنخواہوں کا جھانسہ دے کر 30 بنگلہ دیشی کارکنوں کو مبینہ طور پر دھوکے سے بھیجنے کے الزام میں بنگلہ دیش کی حکومت نے 3 ریکروٹنگ ایجنسیوں کے لائسنس منسوخ اور ان کی سیکیورٹی ڈپازٹس بھی ضبط کر لی ہیں۔
بنگلہ دیش کی وزارتِ بہبودِ تارکینِ وطن و سمندر پار روزگار کی جانب سے پیر کو جاری بیان کے مطابق یہ کارروائی وزارت کے مشیر عارف الحق چودھری کی ہدایت پر کی گئی۔
جن ریکروٹنگ ایجنسیوں کے خلاف کارروائی کی گئی ان میں آر ایس انٹرنیشنل، جبلِ نور اور ٹی ایس اوورسیز لمیٹڈ شامل ہیں۔
یہ بھی پڑھیں: اسلامی بینک بنگلہ دیش کے نئے چیئرمین کی تقرری پر احتجاج، پولیس کی کارروائی
وزارت کے مطابق ان ایجنسیوں نے کارکنوں کو اعلیٰ تنخواہوں اور دیگر پرکشش مراعات کے جھوٹے وعدے کر کے گمراہ کیا اور مشکوک حالات میں ان کے روس جانے کا انتظام کیا، جس سے ان کی سلامتی اور فلاح و بہبود کو خطرات لاحق ہوئے۔
اوورسیز روزگار کے نام پر دھوکا دہی میں ملوث عناصر کے خلاف سخت کارروائی کا انتباہ دیتے ہوئے عارف الحق چودھری نے کہا کہ بیرونِ ملک روزگار کے جھوٹے وعدوں کے ذریعے بنگلہ دیشی شہریوں کی جانوں کو خطرے میں ڈالنے والوں کے خلاف بلاامتیاز کارروائی کی جائے گی۔
ان کے بقول کسی فرد، ادارے یا نیٹ ورک کو رعایت نہیں دی جائے گی اگر وہ اس معاملے میں ملوث پایا گیا۔
The #Bangladeshi electrician duped into fighting for #Russia
Promised a job with a great salary far from the front line, Mohan Miajee ended up in occupied #Ukraine being tortured and fearing for his life.https://t.co/2EUdPMV3KQ pic.twitter.com/ahZz5fyHCU— SAMRIBackup (@SamriBackup) May 28, 2026
انہوں نے کہا کہ حکومت غیر اخلاقی بھرتی کے طریقوں کو بنگلہ دیش کے اوورسیز روزگار کے شعبے کو نقصان پہنچانے کی اجازت نہیں دے گی اور ایسے واقعات کی روک تھام کے لیے نگرانی کے نظام کو مزید مضبوط بنایا جائے گا۔
مشیر نے بتایا کہ متاثرہ کارکنوں کی محفوظ اور جلد وطن واپسی کے لیے سفارتی ذرائع سے کوششیں جاری ہیں۔
انہوں نے ماسکو میں بنگلہ دیش کے سفیر سے رابطہ کر کے سفارت خانے کو متاثرین کی حفاظت اور ہر ممکن مدد فراہم کرنے کی ہدایات بھی جاری کی ہیں۔
مزید پڑھیں: بنگلہ دیش میں چمڑے کی منڈی بحران کا شکار، مدارس اور یتیم خانوں کو خسارہ، وجہ کیا ہے؟
وزارت نے بیرونِ ملک روزگار کے خواہش مند افراد کو مشورہ دیا ہے کہ وہ کسی بھی ریکروٹنگ ایجنسی کی قانونی حیثیت کی مکمل تصدیق کریں اور ملازمت کے معاہدے، تنخواہ اور کام کے حالات کا بغور جائزہ لینے کے بعد ہی مالی ادائیگی یا سفری انتظامات کریں۔
بنگلہ دیش کے لیے بیرونِ ملک مزدوروں کی ترسیلاتِ زر زرمبادلہ کا ایک اہم ذریعہ ہیں، جس کے باعث انسانی اسمگلنگ اور روزگار سے متعلق دھوکا دہی کی روک تھام کے لیے ریکروٹنگ ایجنسیوں کی مؤثر نگرانی حکومتی ترجیحات میں شامل ہے۔
