وفاقی دارالحکومت اسلام آباد سمیت بالائی علاقوں میں ہونے والی بارش نے گرمی کی شدت میں نمایاں کمی کر دی ہے اور موسم خوشگوار ہو گیا ہے، جبکہ محکمہ موسمیات نے آئندہ 24 گھنٹوں کے دوران ملک کے بیشتر حصوں میں گرم اور خشک موسم کی پیش گوئی کی ہے۔ تاہم چند علاقوں میں آندھی اور گرج چمک کے ساتھ بارش کا امکان برقرار ہے۔
مزید پڑھیں: اگست تک ملک بھر میں معمول سے کم بارشوں اور زیادہ گرمی کا امکان، محکمہ موسمیات کا انتباہ
محکمہ موسمیات کے مطابق اسلام آباد اور گردونواح میں جزوی ابر آلود موسم رہنے کے ساتھ کہیں کہیں تیز ہواؤں اور گرج چمک کے ساتھ بارش متوقع ہے۔ دارالحکومت میں زیادہ سے زیادہ درجہ حرارت 35 سے 37 ڈگری سینٹی گریڈ کے درمیان رہنے کا امکان ہے۔
اسلام آباد اور گردو نواح میں موسلا دھار بارش⚡ pic.twitter.com/r5ryfTN2Ip
— WeatherWalay (@weatherwalay) June 4, 2026
پنجاب میں بیشتر اضلاع میں موسم گرم اور خشک رہے گا، تاہم مری، گلیات، راولپنڈی، جہلم، اٹک، لاہور، سیالکوٹ، گوجرانوالہ، نارووال اور فیصل آباد سمیت بالائی و وسطی علاقوں میں شام یا رات کے اوقات میں بارش اور آندھی چلنے کی توقع ہے۔ جنوبی پنجاب کے بہاولپور، رحیم یار خان، راجن پور اور ڈیرہ غازی خان میں بھی گرج چمک کے ساتھ بارش ہو سکتی ہے۔
خیبرپختونخوا کے بیشتر علاقوں میں موسم خشک اور گرم رہے گا، تاہم سوات، کالام، کوہستان، بٹگرام، ایبٹ آباد، مالاکنڈ، وزیرستان اور ملحقہ علاقوں میں بارش اور گرج چمک کا امکان ہے۔
Islamabad Rainfall
04-06-2026
09:30 A.M
a. Saidpur- 30
b. Golra – 13
c. Bokra – 18
d. PMD- 40
e. Shamsabad – 47
f. Chaklala – 25
g. Pirwidahi – 19
h. Gawalmandi – 35
i. New Kattarian – 35 pic.twitter.com/tR8iBndcBv— Pak Met Department محکمہ موسمیات (@pmdgov) June 4, 2026
سندھ میں گرمی کی شدت برقرار رہے گی اور بیشتر اضلاع میں موسم بہت گرم اور خشک رہنے کی پیش گوئی کی گئی ہے۔ تاہم دادو، لاڑکانہ اور جنوب مشرقی علاقوں میں کہیں کہیں آندھی اور گرج چمک کے ساتھ بارش متوقع ہے۔ کراچی میں موسم جزوی ابر آلود رہنے کا امکان ہے جبکہ درجہ حرارت 35 سے 37 ڈگری سینٹی گریڈ کے درمیان رہ سکتا ہے۔
بلوچستان کے بیشتر اضلاع میں گرم اور خشک موسم رہے گا جبکہ جنوبی علاقوں میں شدید گرمی برقرار رہے گی۔ تاہم نصیر آباد، کوہلو، بارکھان، موسیٰ خیل، لورالائی اور خضدار کے بعض علاقوں میں بارش اور گرج چمک کی پیش گوئی کی گئی ہے۔
مزید پڑھیں:خیبرپختونخوا میں تیز ہواؤں کے ساتھ بارش، مختلف واقعات میں 20 سے زیادہ افراد زخمی
آج مدت بعد ایسی بھرپور بارش ہوئی کہ اسلام آباد دھل کر نئی دلہن کی طرح نکھر آیا۔ سبز پہاڑ، بھیگی سڑکیں، دھلے ہوئے درخت اور ٹھنڈی ہوا—ہر منظر دل کو موہ لینے والا تھا۔@pmdgov @iamabidmalik @AbidJamalQazi #Islamabad pic.twitter.com/mbLy3eqoBU
— Media Talk (@mediatalk922) June 4, 2026
محکمہ موسمیات کے مطابق آزاد کشمیر کے مختلف علاقوں میں بھی کہیں کہیں بارش اور گرج چمک متوقع ہے، جس سے موسم مزید خوشگوار ہو سکتا ہے۔
ماہرین موسمیات کا کہنا ہے کہ حالیہ بارشوں نے اسلام آباد، راولپنڈی اور بالائی پنجاب میں گرمی کا زور وقتی طور پر توڑ دیا ہے، تاہم سندھ، جنوبی پنجاب اور بلوچستان کے میدانی علاقوں میں شدید گرمی کی لہر بدستور برقرار رہنے کا امکان ہے۔
