محکمہ موسمیات نے ملک کے بیشتر علاقوں میں شدید گرمی کی لہر (ہیٹ ویو) کی پیشگوئی کرتے ہوئے باقاعدہ الرٹ جاری کردیا ہے۔
سرکاری الرٹ کے مطابق 7 جون سے 12 جون تک ملک کے مختلف حصے شدید گرمی کی لپیٹ میں رہیں گے، جبکہ بالائی علاقوں میں ہوا کے شدید دباؤ کے باعث درجہ حرارت معمول سے 4 سے 6 ڈگری سینٹی گریڈ تک زیادہ رہنے کا امکان ہے۔
یہ بھی پڑھیں: شدید گرمی اور خشک موسم سے ایشیا کی فصلیں متاثر، طاقتور ’ایل نینو‘ کے خدشات بڑھ گئے
محکمہ موسمیات کی تفصیلات کے مطابق صوبہ سندھ کے اضلاع سکھر، شکارپور، قمبر شہدادکوٹ، جیکب آباد، لاڑکانہ، دادو اور شہید بینظیر آباد سمیت سبی، تربت اور پنجگور میں درجہ حرارت 48 سے 51 ڈگری سینٹی گریڈ تک پہنچ سکتا ہے۔
پنجاب کے میدانی علاقوں بشمول لاہور، اوکاڑہ، کسور، فیصل آباد، سرگودھا، جھنگ، ساہیوال، ملتان، ڈیرہ غازی خان اور رحیم یار خان میں 8 سے 11 جون کے دوران پارہ 44 سے 48 ڈگری سینٹی گریڈ تک جانے کی توقع ہے۔
صوبائی دارالحکومت کراچی میں 8 سے 12 جون تک درجہ حرارت 40 سے 43 ڈگری سینٹی گریڈ تک بڑھنے کا امکان ظاہر کیا گیا ہے۔
رپورٹ کے مطابق وفاقی دارالحکومت اسلام آباد، راولپنڈی، اٹک، چکوال، جہلم اور آزاد کشمیر کے علاقوں مظفرآباد، باغ اور کوٹلی میں 8 سے 10 جون تک زیادہ سے زیادہ درجہ حرارت 41 سے 44 ڈگری سینٹی گریڈ کے درمیان رہے گا۔
یہ بھی پڑھیں: اگست تک ملک بھر میں معمول سے کم بارشوں اور زیادہ گرمی کا امکان، محکمہ موسمیات کا انتباہ
خیبر پختونخوا کے اضلاع پشاور، مردان، بنوں اور ڈیرہ اسماعیل خان میں بھی درجہ حرارت 41 سے 46 ڈگری سینٹی گریڈ تک ریکارڈ کیا جا سکتا ہے۔
چترال، دیر، سوات اور گلگت بلتستان کے پہاڑی علاقوں میں بھی گرمی 37 سے 40 ڈگری سینٹی گریڈ تک پہنچنے کی پیشگوئی ہے۔
محکمہ موسمیات نے خبردار کیا ہے کہ اس دوران رات کے درجہ حرارت میں بھی اضافہ ہوگا اور جنوبی پنجاب اور سندھ میں گرمی کی شدت کی وجہ سے مٹی کے طوفان بھی چل سکتے ہیں۔
عوام، بالخصوص بچوں، خواتین اور بزرگوں کو احتیاط برتنے اور کسانوں کو اپنے مویشیوں اور فصلوں کا خاص خیال رکھنے کی ہدایت کی گئی ہے۔
