پاکستان نے مردوں کے انڈر 18 ہاکی ایشیا کپ 2026 میں ملائیشیا کو 0-3 سے شکست دے کر کانسی کا تمغہ اپنے نام کر لیا۔
ہفتے کے روز کھیلے گئے تیسری پوزیشن کے میچ میں قومی ٹیم نے شاندار کھیل کا مظاہرہ کرتے ہوئے حریف کو یکطرفہ مقابلے کے بعد زیر کرلیا۔
پاکستان کا جارحانہ آغاز
بھارت کے خلاف سیمی فائنل میں 3-5 کی سخت شکست کے بعد ٹائٹل کی دوڑ سے باہر ہونے والی پاکستانی ٹیم نے پوزیشن پلے آف میچ کا آغاز انتہائی جارحانہ انداز میں کیا۔
میچ کے تیسرے ہی منٹ میں عزیر احمد نے شاندار فیلڈ گول اسکور کر کے پاکستان کو برتری دلا دی۔
پاکستان نے ابتدائی برتری کے بعد بھی کھیل پر اپنی گرفت برقرار رکھی۔ پہلے کوارٹر کے اختتامی لمحات میں عدیل کو گرین کارڈ ملا، تاہم اس کے باوجود قومی ٹیم نے دباؤ برقرار رکھا اور 23ویں منٹ میں عاصم حیدر نے پینلٹی اسٹروک کو گول میں تبدیل کرکے برتری دگنی کر دی۔
تیسرے کوارٹر میں گول نہ ہو سکا
تیسرے کوارٹر کے دوران مجموعی طور پر پانچ پینلٹی کارنرز دیے گئے جن میں سے تین پاکستان اور 2 ملائیشیا کو ملے، تاہم دونوں ٹیمیں ان مواقع سے فائدہ نہ اٹھا سکیں اور اسکور 0-2 پر برقرار رہا۔
عدیل کا آخری لمحات میں فیصلہ کن وار
آخری کوارٹر کے بیشتر حصے میں کوئی گول نہ ہو سکا، تاہم میچ کے اختتامی لمحوں میں عدیل نے شاندار فیلڈ گول کر کے پاکستان کی فتح پر مہر ثبت کر دی۔ اس طرح قومی ٹیم نے 0-3 سے کامیابی حاصل کرتے ہوئے ٹورنامنٹ میں تیسری پوزیشن حاصل کر لی۔
پاکستان کا ٹورنامنٹ میں سفر
پاکستان نے اپنے پہلے میچ میں چین کو 0-3 سے شکست دے کر مہم کا فاتحانہ آغاز کیا تھا، تاہم دوسرے میچ میں ملائیشیا کے ہاتھوں 2-3 سے شکست کا سامنا کرنا پڑا۔
بعد ازاں قومی ٹیم نے بنگلہ دیش کو 2-5 سے ہرا کر گروپ بی میں پہلی پوزیشن حاصل کی اور سیمی فائنل کے لیے کوالیفائی کیا، جہاں اسے روایتی حریف بھارت کے خلاف 3-5 سے شکست کا سامنا کرنا پڑا۔
