چیف الیکشن کمشنر گلگت بلتستان راجا شہباز نے قانون ساز اسمبلی کے تمام 24 حلقوں کے ریٹرننگ افسران کو ہدایت جاری کی ہے کہ امیدواروں اور پولنگ ایجنٹس کو مصدقہ فارم 45 کی فراہمی یقینی بنائی جائے۔
چیف الیکشن کمشنر نے واضح کیاکہ فارم 45 کے اجرا کا عمل الیکشن ایکٹ 2017 اور الیکشن رولز 2017 کی متعلقہ شقوں کے مطابق مکمل کیا جائے۔
الیکشن کمیشن گلگت بلتستان نے تمام ریٹرننگ افسران کو ہدایات پر سختی سے عملدرآمد یقینی بنانے کی بھی تاکید کی ہے۔
الیکشن کمیشن کے مطابق جن پولنگ اسٹیشنز پر ووٹوں کی گنتی کا عمل مکمل ہو چکا ہے وہاں فارم 45 جاری کیے جا رہے ہیں، لہٰذا میڈیا ادارے فارم 45 کے اجرا سے متعلق غیر مصدقہ یا گمراہ کن خبریں نشر کرنے سے گریز کریں۔
الیکشن کمیشن کا کہنا ہے کہ شفافیت اور قانونی تقاضوں کو یقینی بنانے کے لیے اس حوالے سے ایک مرتبہ پھر واضح ہدایات جاری کر دی گئی ہیں۔
واضح رہے کہ گلگت بلتستان کے عام انتخابات میں پولنگ کا عمل مکمل ہونے کے بعد ووٹوں کی گنتی جارہی ہے، اور غیر حتمی غیر سرکاری نتائج بھی آنا شروع ہوگئے ہیں۔
