وزیراعظم شہباز شریف نے گلگت بلتستان میں شفاف، پرامن اور سیاسی سرگرمیوں سے بھرپور انتخابات کے انعقاد پر عوام کو مبارکباد دیتے ہوئے کہا ہے کہ پاکستان پیپلز پارٹی اکثریتی سیاسی جماعت کے طور پر سامنے آئی ہے، جس پر وہ مبارکباد کی مستحق ہے۔
مزید پڑھیں: گلگت بلتستان میں پیپلز پارٹی سب سے بڑی جماعت بن کر ابھر رہی ہے، حکومت بنانے کی کوشش کریں گے، بلاول بھٹو
وزیراعظم آفس کے میڈیا ونگ سے جاری بیان کے مطابق شہباز شریف نے آصف علی زرداری اور بلاول بھٹو زرداری کو بھی انتخابی کامیابی پر مبارکباد پیش کی۔
وزیراعظم نے کہا کہ پاکستان مسلم لیگ (ن) کے کامیاب امیدواروں نے بھی بھرپور مقابلہ کیا اور پارٹی ٹیم نے انتخابات میں بھرپور محنت کی، جس پر وہ انہیں شاباش دیتے ہیں۔
شہباز شریف نے گلگت بلتستان کے تمام کامیاب امیدواروں کو مبارکباد پیش کرتے ہوئے کہا کہ سیاسی عمل میں بھرپور شرکت کرنے پر گلگت بلتستان کے عوام خصوصی تحسین کے مستحق ہیں۔
انہوں نے کہا کہ پرامن، شفاف انتخابات اور بھرپور سیاسی سرگرمیاں جمہوریت کا حسن ہیں۔ الیکشن کمیشن نے غیر جانبدار اور شفاف انتخابات کے انعقاد کو یقینی بنایا، جو قابلِ ستائش ہے۔
مزید پڑھیں: گلگت بلتستان انتخابات: پیپلز پارٹی 10 نشستوں کے ساتھ سب سے آگے، 17 حلقوں کے غیر سرکاری نتائج جاری
وزیراعظم نے پولیس اور دیگر قانون نافذ کرنے والے اداروں کے کردار کو بھی سراہتے ہوئے کہا کہ امن و امان برقرار رکھنے اور پرامن انتخابات کے انعقاد میں ان اداروں نے اہم کردار ادا کیا، جس پر وہ مبارکباد کے مستحق ہیں۔
انہوں نے اس امید کا اظہار کیا کہ نو منتخب نمائندے گلگت بلتستان کی ترقی، خوشحالی اور عوامی فلاح کے لیے اپنی ذمہ داریاں احسن انداز میں انجام دیں گے۔
