کالعدم ایکشن کمیٹی کے کور کمیٹی رکن توصیف جرال نے بھمبر میں خود کو پولیس کے حوالے کرتے ہوئے سرینڈر کر دیا ہے۔
توصیف جرال کا کہنا ہے کہ وہ عوامی ایکشن کمیٹی کی تحریک کا مزید حصہ نہیں رہ سکتے کیونکہ تنظیم کو کالعدم قرار دیے جانے کے بعد اس کی سرگرمیاں اپنے بنیادی مقاصد سے ہٹ چکی ہیں۔
مزید پڑھیں: عوامی ایکشن کمیٹی کے 72 کارکن گرفتار، اسلحہ اور مواصلاتی آلات برآمد،ترجمان پولیس آزاد کشمیر
ان کے مطابق وہ عوامی اور انسانی حقوق کے تحفظ کے مقصد کے تحت اس تحریک سے وابستہ ہوئے تھے، تاہم اب انہیں محسوس ہوتا ہے کہ تنظیم کی قیادت کسی اور ایجنڈے پر کام کر رہی ہے۔
انہوں نے کہا کہ وہ کسی ایسی تنظیم کا حصہ نہیں بننا چاہتے جو عوام کے مفادات کے بجائے انتشار یا نقصان کا باعث بنے۔ توصیف جرال کے مطابق اسی وجہ سے انہوں نے خود کو قانون نافذ کرنے والے اداروں کے حوالے کرنے کا فیصلہ کیا۔
مزید پڑھیں: آزاد کشمیر میں 9 جون کے احتجاج سے قبل ہی جوائنٹ عوامی ایکشن کمیٹی کالعدم تنظیم قرار، نوٹیفکیشن جاری
ذرائع کے مطابق توصیف جرال اس وقت بھمبر جیل میں موجود ہیں جبکہ معاملے سے متعلق مزید قانونی کارروائی جاری ہے۔
