ایران اور اسرائیل کے درمیان حملوں میں وقفے کے اعلان کے بعد اسٹاک ایکسچینج میں منگل کے روز کاروبار کے آغاز پر سرمایہ کاروں کا اعتماد بحال ہوتا نظر آیا۔
منگل کی صبح کاروبار کے ابتدائی منٹوں میں بینچ مارک کے ایس ای 100 انڈیکس 2 ہزار سے زائد پوائنٹس اضافے کے ساتھ 170,954.65 پوائنٹس کی سطح پر پہنچ گیا، جو 2,000.95 پوائنٹس یعنی 1.18 فیصد اضافہ ظاہر کرتا ہے۔
یہ بھی پڑھیں: سرمایہ کاروں کا اعتماد اسٹاک ایکسچینج میں بہتری کا باعث، کیا معیشت مستحکم ہورہی ہے؟
مارکیٹ میں خریداری کا رجحان نمایاں رہا، خصوصاً آٹوموبائل اسمبلرز، سیمنٹ، کمرشل بینکوں، کھاد، تیل و گیس کی تلاش کرنے والی کمپنیوں اور آئل مارکیٹنگ کمپنیوں کے شعبوں میں سرمایہ کاری بڑھی۔
ماری پیٹرولیم، او جی ڈی سی، پاکستان پیٹرولیم لمیٹڈ، پاکستان آئل فیلڈز، حبکو، پاکستان اسٹیٹ آئل، میزان بینک اور نیشنل بینک جیسے اہم شیئرز مثبت زون میں ٹریڈ کرتے رہے۔
Market is up at midday 🚀
⏳ KSE 100 is positive by +1738.59 points (+1.03%) at midday trading. Index is at 170,692.29 and volume so far is 101.44 million shares (12:00 PM) pic.twitter.com/QDOsKsVaMG— Investify Pakistan (@investifypk) June 9, 2026
اس سے قبل پیر کے روز ایران اور اسرائیل کے درمیان حملوں کے تبادلے میں شدت اور سفارتی پیش رفت کی امیدوں میں کمی کے باعث سرمایہ کار محتاط رہے تھے۔
جس کے نتیجے میں پاکستان اسٹاک ایکسچینج مسلسل دوسرے روز بھی دباؤ کا شکار رہی، جغرافیائی سیاسی غیر یقینی صورتحال نے مارکیٹ کے مجموعی رجحان پر منفی اثر ڈالا تھا۔
مزید پڑھیں: اسٹاک ایکسچینج میں زبردست تیزی، انڈیکس میں 500 سے زائد پوائنٹس کا اضافہ
گزشتہ روز یعنی پیر کو بینچ مارک 100 انڈیکس 22 مئی کے بعد پہلی بار 170,000 پوائنٹس کی اہم نفسیاتی حد سے نیچے گر گیا تھا اور کاروبار کے اختتام پر 168,953.71 پوائنٹس پر بند ہوا تھا۔
دوسری جانب عالمی منڈیوں میں بھی منگل کو بہتری کا رجحان دیکھا گیا، ایران اور اسرائیل کی جانب سے حملے روکنے کے اعلان کے بعد ایشیائی اسٹاک مارکیٹوں میں تیزی آئی جبکہ خام تیل کی قیمتیں اپنی بلند ترین سطح سے نیچے آگئیں۔
جنوبی کوریا کی اسٹاک مارکیٹ میں 3.4 فیصد اضافہ ریکارڈ کیا گیا، جبکہ جاپان کا نکی انڈیکس 0.9 فیصد مضبوط ہوا، جاپان کے علاوہ ایشیا پیسیفک خطے کے حصص کا ایم ایس سی آئی انڈیکس 1.5 فیصد بڑھ گیا۔
مزید پڑھیں: ایران امریکا معاہدے کی امید، ایشیائی اسٹاک مارکیٹوں میں زبردست تیزی، تیل کی قیمتوں میں کمی
چین میں بلیو چِپ حصص 0.4 فیصد اوپر رہے، سرکاری تجارتی اعداد و شمار کے مطابق مئی میں چینی برآمدات میں 19.4 فیصد اور درآمدات میں 27.4 فیصد اضافہ ہوا، جو ماہرین کے اندازوں سے بہتر رہا۔
تجزیہ کاروں کے مطابق یہ اعداد و شمار امریکی ٹیرف اور دیگر تجارتی رکاوٹوں کے باوجود چین کی نئی منڈیوں تک رسائی کی صلاحیت کو ظاہر کرتے ہیں۔
