اسلام آباد ٹریفک پولیس نے گزشتہ 6 ماہ کی کارکردگی رپورٹ جاری کرتے ہوئے بتایا ہے کہ ٹریفک قوانین پر عملدرآمد، شہریوں کو سہولیات کی فراہمی، روڈ سیفٹی آگاہی اور ٹریفک کی روانی بہتر بنانے کے لیے متعدد اقدامات کیے گئے۔
ترجمان اسلام آباد ٹریفک پولیس کے مطابق گزشتہ 6 ماہ کے دوران 1 لاکھ 60 ہزار سے زائد شہریوں کے ڈرائیونگ لائسنس سے متعلق امور نمٹائے گئے۔ ان میں 66 ہزار سے زائد شہریوں کو لرنر پرمٹ جاری کیے گئے جبکہ 38 ہزار سے زائد ڈرائیونگ لائسنسوں کی تجدید کی گئی۔
یہ بھی پڑھیں: رواں برس کے دوران اسلام آباد پولیس کی کارکردگی کیسی رہی؟
اسی عرصے میں 50 ہزار سے زائد نئے ڈرائیونگ لائسنس جاری کیے گئے جبکہ 35 سو سے زائد ڈپلیکیٹ لائسنس فراہم کیے گئے۔ علاوہ ازیں 5 ہزار سے زائد لائسنسوں کو کنورٹ اور انڈورس بھی کیا گیا۔
رپورٹ کے مطابق اسلام آباد ٹریفک پولیس نے 5 لاکھ سے زائد شہریوں کو روڈ سیفٹی اور ٹریفک قوانین سے متعلق آگاہی فراہم کی۔ روڈ ایجوکیشن پروگرام کے تحت 2 لاکھ سے زائد افراد کو آگاہ کیا گیا جبکہ مختلف مارکیٹوں میں سرگرمیوں کے دوران 54 ہزار سے زائد شہریوں تک پیغام پہنچایا گیا۔
گڈ سٹیزن مہم کے تحت 74 ہزار سے زائد اور فرینڈز آف پولیس پروگرام کے ذریعے 97 ہزار سے زائد افراد کو ٹریفک قوانین اور محفوظ سفر کے حوالے سے معلومات دی گئیں۔
ترجمان کے مطابق مختلف تعلیمی اداروں، سرکاری و نجی دفاتر اور عوامی مقامات پر منعقدہ روڈ سیفٹی سیمینارز میں بھی ہزاروں شہریوں کو ٹریفک قوانین اور محفوظ ڈرائیونگ سے متعلق آگاہی دی گئی۔
یہ بھی پڑھیں: اسلام آباد پولیس کی آپریشنل کمانڈرز کانفرنس، کارکردگی اور سیکیورٹی اقدامات کا جائزہ
ٹریفک قوانین کی خلاف ورزیوں کے خلاف کارروائی کرتے ہوئے اسلام آباد ٹریفک پولیس نے 3 لاکھ سے زائد قانون شکنوں کے خلاف قانونی کارروائی کی۔ لین کی خلاف ورزی پر 25 ہزار سے زائد، غیر قانونی پارکنگ پر 47 ہزار سے زائد، فینسی نمبر پلیٹ کے استعمال پر 32 ہزار سے زائد اور بغیر ہیلمٹ موٹر سائیکل چلانے پر 16 ہزار سے زائد افراد کے خلاف کارروائی کی گئی۔
اسی طرح رانگ وے ڈرائیونگ پر 18 ہزار سے زائد جبکہ اوورلوڈنگ پر 21 ہزار سے زائد گاڑیوں کے خلاف قانونی کارروائی عمل میں لائی گئی۔
ترجمان نے کہا کہ اسلام آباد ٹریفک پولیس جدید ٹیکنالوجی کے استعمال، شہری خدمت مراکز کی بہتری اور محفوظ سفری ماحول کی فراہمی کے لیے مسلسل کوشاں ہے۔ شہریوں کی جان و مال کا تحفظ، وفاقی دارالحکومت میں منظم ٹریفک نظام اور بلا تعطل روانی اسلام آباد ٹریفک پولیس کی اولین ترجیح ہے۔
