سابق سینیٹر تاج آفریدی ٹریفک حادثے میں جاں بحق ہوگئے ہیں۔
ترجمان موٹروے کے مطابق موٹروے ایم ون پر صوابی کے قریب ایک المناک ٹریفک حادثے میں سابق سینیٹر تاج آفریدی جاں بحق ہو گئے ہیں، وہ اسلام آباد سے پشاور جا رہے تھے کہ کرنل شیر خان انٹرچینج کے قریب ان کی گاڑی کو حادثہ پیش آیا۔
ابتدائی اطلاعات کے مطابق، یہ افسوسناک واقعہ گاڑی میں اچانک پیدا ہونے والے مکینیکل فالٹ کی وجہ سے پیش آیا، جبکہ واقعے میں ان کا ڈرائیور معمولی زخمی ہوا ہے۔
گورنر فیصل کریم کنڈی کا اظہار افسوس
گورنر خیبرپختونخوا فیصل کریم کنڈی نے سابق سینیٹر تاج آفریدی کی ٹریفک حادثے میں شہادت پر گہرے رنج و غم اور افسوس کا اظہار کیا ہے۔
اپنے تعزیتی پیغام میں انہوں نے کہا کہ وہ سینیٹر تاج آفریدی کی وفات پر دلی طور پر غمزدہ ہیں. انہوں نے دعا کی کہ اللہ تعالیٰ شہید کو جنت الفردوس میں اعلیٰ مقام عطا فرمائے اور ان کے پسماندگان کو یہ صدمہ برداشت کرنے کے لیے صبرِ جمیل دے۔
