رات کے آخری پہر جب دنیا گہری نیند کے آغوش میں ہوتی ہے، ٹھیک اسی وقت ایک سرپھرے پڑوسی کی عجیب و غریب حرکت نے پورے محلے کا سکون غارت کر رکھا ہے۔
ایک برطانوی اخبار کی رپورٹ کے مطابق، ایک شہری اپنے پڑوسی کی عجیب و غریب اور غیر سماجی حرکت کی وجہ سے شدید ذہنی کوفت کا شکار ہے، جو گزشتہ چند ماہ سے ہر ہفتے کے آخر پر رات ڈھائی بجے اپنے گھر کے لان کی گھاس کاٹنا شروع کردیتا ہے۔
یہ بھی پڑھیں:اگر آپ کو بھی پڑوس کا شور بہت پریشان کرتا ہے تو یہ خبر آپ کے لیے ہے؟
متاثرہ شخص کا کہنا ہے کہ وہ اکثر رات کے اس پہر لان موور (گھاس کاٹنے والی مشین) کی آواز سے اچانک جاگ اٹھتا ہے، جس کی وجہ سے اس کی نیند بری طرح متاثر ہو رہی ہے۔
رپورٹ کے مطابق، متاثرہ شہری کا اندازہ ہے کہ اس کا پڑوسی شاید رات کی شفٹ میں کام کرتا ہے کیونکہ اس کی گاڑی دن بھر گھر پر موجود ہوتی ہے اور رات کو غائب رہتی ہے۔ تاہم اس کا ماننا ہے کہ عجیب اوقات میں نوکری کرنا رات کے ڈھائی بجے فرنٹ اور بیک لان کی گھاس کاٹنے کا کوئی جواز نہیں ہو سکتا۔
یہ بھی پڑھیں: مرغیاں محلے کا سکون تباہ کرتی ہیں، خاتون نے عدالت کا دروازہ کھٹکھٹادیا
متاثرہ شخص نے بتایا کہ ارد گرد اور بھی کئی گھر موجود ہیں اور وہ اکیلا نہیں ہے جو اس شور سے پریشان ہوتا ہوگا، لیکن اب تک کسی نے اس معاملے پر آواز نہیں اٹھائی۔
سوشل میڈیا پر اس حوالے سے رائے مانگتے ہوئے متاثرہ شہری نے پوچھا ہے کہ کیا اگلی بار ایسا ہونے پر اسے اپنے پڑوسی کے پاس جا کر اس سخت اور غیر مناسب رویے پر براہ راست بات کرنی چاہیے یا نہیں۔
یہ بھی پڑھیں:آتش بازی: بیماروں خصوصاً مائسو فونیا کے شکار افراد کے لیے ایک مشکل لمحہ
اس پوسٹ پر صارفین کی جانب سے ملے جلے ردعمل کا اظہار کیا جارہا ہے، جہاں کچھ لوگ اسے شدید بدتمیزی قرار دے رہے ہیں جبکہ کچھ کا کہنا ہے کہ معاملے کو آرام سے بھی حل کیا جاسکتا ہے۔
