امریکی ریاست کیلیفورنیا کے پہاڑی علاقے میمتھ لیکس میں اپنے پالتو کتوں کو بچانے کے لیے ایک جوڑے نے پانی کی بوتل اور کلہاڑی کی مدد سے ایک سیاہ ریچھ پر قابو پا لیا۔
یہ واقعہ جمعرات کی صبح کے وقت اس وقت پیش آیا جب گھر کی خاتون نے باہر کتوں کے بھونکنے کی آواز سنی اور دیکھا کہ ایک سیاہ ریچھ ان کے کتے پر حملہ آور ہے۔
یہ بھی پڑھیں: جاپان میں ریچھوں کے حملوں میں ریکارڈ اضافے کے بعد مانسٹر وولف روبوٹ کی مانگ میں تیزی
خاتون نے اپنے پالتو جانور کو بچانے کے لیے مداخلت کی تو ریچھ نے ان پر حملہ کر دیا اور انہیں دانتوں اور ناخنوں سے زخمی کرنا شروع کر دیا۔ شور سن کر ان کا ساتھی بھی باہر نکل آیا اور ریچھ نے اس پر بھی انتہائی جارحانہ انداز میں حملہ کر دیا۔
اس دوران خاتون نے ریچھ کا دھیان بٹانے کے لیے پاس موجود پانی کی بوتل سے اس پر ضربیں لگائیں، جس کے بعد ان کے ساتھی نے گھر کے اندر سے کلہاڑی لا کر اس کے الٹے حصے سے ریچھ پر کئی وار کیے۔
یہ بھی پڑھیں: ریچھ کی بیکری میں گھسنے کی ناکام کوشش، دلچسپ ویڈیو منظر عام پر
کلہاڑی کے وار سے ریچھ شدید زخمی ہو گیا اور یہ مقابلہ ختم ہوا، جس کے بعد زخمی جوڑے نے خود گاڑی چلا کر ہسپتال پہنچ کر طبی امداد حاصل کی۔ پولیس کے مطابق یہ ریچھ تقریباً 17 ماہ کا تھا جس کا وزن 70 پاؤنڈ کے قریب تھا۔
کیلیفورنیا کے محکمہ وائلڈ لائف نے بعد میں اس ریچھ کو عوامی تحفظ کے لیے خطرہ قرار دیتے ہوئے ماردیا، جبکہ جوڑے اور ان کے کتوں کی حالت اب خطرے سے باہر ہے۔
