سعودی عرب کے ٹرانسپورٹ سیکٹر کو بین الاقوامی سطح پر ایک بار پھر اہم پذیرائی حاصل ہوئی ہے، جہاں سعودی عرب ریلوے یعنی ایس اے آر نے 2 عالمی ایوارڈز حاصل کیے ہیں، جبکہ انٹرنیشنل ایئر ٹرانسپورٹ ایسوسی ایشن یعنی ایاٹا نے سعودی عرب کے ایئر ٹریفک مینجمنٹ کی کارکردگی کو سراہا ہے۔
سعودی پریس ایجنسی کے مطابق یہ کامیابیاں اس بات کی عکاسی کرتی ہیں کہ سعودی عرب اپنے ریل اور ہوا بازی کے شعبوں میں آپریشنل معیار، حفاظتی اقدامات اور انفراسٹرکچر کی مضبوطی کو عالمی معیار کے مطابق بہتر بنانے کے لیے مسلسل کوششیں کر رہا ہے۔
سعودی عرب ریلوے نے آپریشنل سیفٹی اور رسک مینجمنٹ کے میدان میں اپنی مضبوط پوزیشن برقرار رکھتے ہوئے 2 بین الاقوامی ایوارڈز حاصل کیے ہیں، جو ادارے کی حالیہ برسوں میں جاری تنظیمی تبدیلیوں کا اعتراف ہیں۔
ایس اے آر کو سیف 365 کی جانب سے ایکسیلینس ان ڈیجیٹل ٹرانسفارمیشن آف سیفٹی سسٹمز ایوارڈ جبکہ انٹرنیشنل انسٹیٹیوٹ آف رسک اینڈ سیفٹی مینیجمنٹ کی جانب سے رسک ٹیم آف دا ایئر سے نوازا گیا۔
یہ بھی پڑھیں: سعودی عرب کی بڑی کامیابی: مسلسل تیسری بار آئی ایس ای ایف میں دنیا میں دوسرا پوزیشن
سیف 365 نے ایس اے آر کے اس جدید ڈیجیٹل فریم ورک کو سراہا جس کے ذریعے ادارہ اپنی حفاظتی کلچر کی بہتری اور پیمائش کرتا ہے، جبکہ انٹرنیشنل انسٹیٹیوٹ آف رسک اینڈ سیفٹی مینیجمنٹ نے رسک مینجمنٹ کے مؤثر نظام اور مربوط ادارہ جاتی حکمت عملی کے ذریعے آپریشنل سیفٹی بہتر بنانے پر کمپنی کی کاوشوں کو تسلیم کیا۔
یہ ایوارڈز اس بات کی نشاندہی کرتے ہیں کہ ایس اے آر نے سیفٹی کو محض ایک تعمیلی ضرورت کے بجائے ادارہ جاتی کلچر میں تبدیل کر دیا ہے، جس میں قیادت کی نگرانی، ڈیٹا پر مبنی فیصلے، پیشگی خطرات کی نشاندہی اور مسلسل بہتری جیسے عناصر شامل ہیں۔
ایاٹا کی سعودی ایئر ٹریفک مینجمنٹ کی تعریف
ہوا بازی کے شعبے میں ایاٹا نے حالیہ علاقائی حالات کے دوران سعودی عرب کی ایئر ٹریفک مینجمنٹ کی کارکردگی کو سراہتے ہوئے کہا کہ مملکت نے غیر معمولی مہارت کے ساتھ فضائی آپریشنز کو جاری رکھا اور کسی بڑی رکاوٹ کے بغیر فضائی آمدورفت کو برقرار رکھا۔
ایسوسی ایشن نے سعودی ایئر نیویگیشن سروسز کو ایک تعریفی خط اور یادگاری شیلڈ بھی دی، جس میں بڑھتے ہوئے فضائی ٹریفک کو مؤثر انداز میں سنبھالنے اور آپریشنز کو مسلسل جاری رکھنے کی کوششوں کو سراہا گیا۔
إياتا يكرّم خدمات الملاحة الجوية السعودية لإدارة 460 ألف رحلة بنجاح.
– التكريم يعكس كفاءة المملكة في إدارة الحركة الجوية وسط التوترات الإقليمية.
– الشركة تسعى لتعزيز قدراتها التقنية وفق مستهدفات رؤية 2030 للنقل الجوي.https://t.co/ZcMxHjIqaj— صحيفة سبق الإلكترونية (@sabqorg) June 18, 2026
ایاٹا کے مطابق سعودی ایئر نیوی گیشن سروسز نے مشکل علاقائی حالات کے باوجود فضائی راستوں کی تنظیم نو اور ٹریفک کی مؤثر نگرانی میں اعلیٰ پیشہ ورانہ مہارت کا مظاہرہ کیا، جس سے سعودی فضائی حدود کی مضبوطی اور عالمی ایئرلائنز کے لیے کم سے کم رکاوٹ کو یقینی بنایا گیا۔
یہ اعتراف ظاہر کرتا ہے کہ سعودی عرب تیزی سے عالمی ٹرانسپورٹ اور لاجسٹکس کے ایک اہم مرکز کے طور پر ابھر رہا ہے۔
