فریضہ حج کی ادائیگی کے لیے 66 ہزار847 پاکستانی عازمینِ حج سعودی عرب پہنچ گئے ہیں۔ منگل کو مزید10 حج پروازیں مکہ مکرمہ پہنچ جائیں گی۔
پاکستان کی وزارت مذہبی امور کے ترجمان نے بتایا ہے کہ 58 ہزار عازمین حج سرکاری حج اسکیم جب کہ 8 ہزار 800 پرائیویٹ اسکیم کے تحت سعودی عرب پہنچ چکے ہیں۔
انہوں نے مزید بتایا کہ پیر اور منگل کی درمیانی شب تک 10 حج پروازوں سے مزید 3 ہزار 44 سرکاری عازمینِ حج مکہ مکرمہ کے لیے روانہ ہو گئے ہیں جب کہ سرکاری و نجی عازمینِ حج کی سعودی عرب کے لیے فلائٹ آپریشن 21 جون تک جاری رہے گا۔
ترجمان کا کہنا ہے کہ اس وقت 304 پاکستانی ڈاکٹرز اور طبی عملہ پر مشتمل ’حج میڈیکل مشن‘ سعودی عرب میں عازمینِ کو طبی سہولیات فراہم کر رہا ہے۔ مکہ اور مدینہ میں مرکزی اسپتال، 9 ڈسپنسریوں اور فرسٹ ایڈ ٹیموں کے ذریعے طبی سہولیات کی فراہمی جاری ہے۔
اس کے علاوہ گمشدگی و بازیابی، مانیٹرنگ، حج کے لیے گائیڈز، کال سینٹرز، مدینہ روانگی، اکاونٹس ، وہیل چیئرز کی فراہمی کے شعبہ جات بھی اس وقت مصروف عمل ہیں ۔
126 حج گروپ آرگنائزرز کی مانیٹرنگ مکمل ہو گئی ہے جب کہ 13شکایات بھی ازالے کے لیے کمیٹی کے سپرد کر دی گئی ہیں جب کہ 25 ہزار عازمینِ حج کی مسجد نبوی میں ریاض الجنہ کی زیارت بھی مکمل ہو چکی ہے۔
حرم گائیڈز نے 51 ہزار سے زیادہ عازمینِ حج کو درست راستہ کی سمت رہنمائی کی۔عازمینِ حج کی رہائش گاہوں پر قربانی کے انتظامات کا آغاز بھی کر دیا گیا ہے ۔
