کالعدم جوائنٹ عوامی ایکشن کمیٹی کو ایک اور بڑا دھچکا لگا ہے، مظفرآباد سے کمیٹی کے کور ممبر انجم زمان اعوان نے تنظیم سے مکمل لاتعلقی کا اعلان کردیا۔
اپنے ویڈیو پیغام میں انہوں نے تنظیم کے موجودہ بیانیے، سرگرمیوں اور طرز سیاست پر شدید تحفظات کا اظہار کرتے ہوئے کہاکہ تنظیم اپنے اصل پرامن مقاصد سے ہٹ چکی ہے اور نوجوانوں کو گمراہ کن راستوں پر دھکیلا جا رہا ہے۔
ایکشن کمیٹی کے مظفرآباد سے اہم کور ممبر انجم زمان اعوان کی ویڈیو سامنے آگئی، کالعدم تنظیم سے لاتعلقی کا اعلان pic.twitter.com/X0fvyatubY
— WE News (@WENewsPk) June 21, 2026
یہ کالعدم جوائنٹ عوامی ایکشن کمیٹی کو لگنے والا مسلسل دوسرا بڑا دھچکا ہے، کیونکہ اس سے قبل تنظیم کے ایک اور کور ممبر ایڈووکیٹ امجد علی خان بھی تنظیم سے علیحدگی اختیار کرتے ہوئے لاتعلقی کا اعلان کر چکے ہیں، جسے تنظیم کے اندر بڑھتے اختلافات، قیادت پر کم ہوتے اعتماد اور داخلی بحران کی علامت قرار دیا جا رہا ہے۔
انجم زمان اعوان نے واضح الفاظ میں کالعدم جوائنٹ عوامی ایکشن کمیٹی کی تباہ کن سیاست سے مکمل لاتعلقی اختیار کرتے ہوئے کہاکہ تنظیم اپنے اصل پرامن مقاصد سے ہٹ چکی ہے۔
ان کے مطابق ایک پرامن تحریک کو انتشار، بے امنی اور غیرقانونی سرگرمیوں کی طرف موڑ دیا گیا، جس کے نتیجے میں نوجوانوں کے مستقبل کو شدید نقصان پہنچا ہے۔
انہوں نے الزام عائد کیاکہ بعض بیرونی ایجنسیاں، پوشیدہ مفادات اور ریاست مخالف عناصر نوجوانوں کو سیاسی مقاصد کے لیے استعمال کر رہے ہیں اور خطے میں بے چینی کو ہوا دے رہے ہیں۔
انجم زمان اعوان نے نوجوانوں پر زور دیا کہ وہ گمراہ کن نعروں، علیحدگی پسند سوچ اور غیرآئینی سرگرمیوں سے دور رہیں اور اپنے مستقبل کو انتشار کی سیاست کی نذر نہ کریں۔
انہوں نے عوام سے بھی اپیل کی کہ وہ ریاست مخالف ایجنڈے کو فروغ دینے والے عناصر سے فاصلہ رکھیں اور آئینی، قانونی اور مثبت سیاسی عمل کا حصہ بنیں۔
اہم رہنماؤں کی پے در پے علیحدگیوں نے کالعدم جوائنٹ عوامی ایکشن کمیٹی کے اندر بڑھتے بحران، داخلی اختلافات اور کمزور پڑتے بیانیے کو مزید نمایاں کردیا ہے۔
