اسلام آباد پولیس کے تھانہ بنی گالا نے بڑی کارروائی کرتے ہوئے خاتون کے اندھے قتل کا معمہ حل کرلیا اور مقتولہ کے سگے باپ، سابق شوہر اور سسر کو گرفتار کرلیا ہے۔
ڈی آئی جی اسلام آباد محمد جواد طارق کے مطابق ملزمان نے تھانہ بنی گالا کی حدود میں 20 مئی 2026 کو مسماۃ بشریٰ کو قتل کیا تھا۔ ملزمان نے واردات کو بجلی کا کرنٹ لگنے کا حادثہ ظاہر کرتے ہوئے مقتولہ کی فوری تدفین بھی کردی تھی تاکہ قتل کے شواہد چھپائے جاسکیں۔
مزید پڑھیں:نوشہرہ: 8 لاکھ روپے کی جائیداد پر تنازع، یورپ سے آئے 3 بھائی اپنوں کے ہاتھوں قتل
انہوں نے بتایا کہ تھانہ بنی گالا پولیس نے سیف سٹی کیمروں، ہیومن انٹیلیجنس اور جدید ٹیکنالوجی کی مدد سے اندھے قتل کو ٹریس کیا اور ملزمان کو گرفتار کرلیا۔
گرفتار ملزمان میں ظاہر شاہ (سگا باپ)، اسد خان (سابق شوہر) اور پیر محمد (سسر) شامل ہیں۔
ڈی آئی جی اسلام آباد محمد جواد طارق نے اندھے قتل کو ٹریس کرکے ملزمان کی گرفتاری پر پولیس ٹیموں کو شاباش دیتے ہوئے کہا کہ تفتیش کو تمام قانونی تقاضوں کے مطابق آگے بڑھایا جائے گا۔
مزید پڑھیں:بیٹیوں کے ہاتھوں نذر آتش ہونے والا شخص اسپتال میں دم توڑ گیا
انہوں نے اس عزم کا اظہار کیا کہ ملزمان کو قرار واقعی سزا دلوانے کے لیے تمام قانونی تقاضے پورے کیے جائیں گے اور مقدمے کی مضبوط پیروی کی جائے گی۔
