حکومت نے پیٹرولیم مصنوعات پر عائد لیوی میں اضافہ کر دیا ہے، جس کے بعد ڈیزل اور پیٹرول دونوں پر فی لیٹر لیوی بڑھ گئی ہے، تاہم فی الحال پیٹرول اور ڈیزل کی قیمتیں برقرار رکھنے کا فیصلہ کیا گیا ہے۔
یہ بھی پڑھیں:حکومت کا پیٹرولیم مصنوعات کی قیمتیں برقرار رکھنے کا فیصلہ
میڈیا رپورٹس کے مطابق حکومت نے ڈیزل پر پیٹرولیم لیوی میں 6 روپے 57 پیسے فی لیٹر اضافہ کر دیا ہے، جس کے بعد ڈیزل پر عائد لیوی 79 روپے 54 پیسے فی لیٹر تک پہنچ گئی ہے۔
رپورٹس کے مطابق پیٹرول پر لیوی میں بھی اضافہ کیا گیا ہے، پیٹرول پر فی لیٹر لیوی 39 پیسے بڑھا کر 66 روپے 64 پیسے کر دی گئی ہے۔
حکام کے مطابق مٹی کے تیل پر عائد لیوی میں کوئی تبدیلی نہیں کی گئی اور اسے 20 روپے 36 پیسے فی لیٹر برقرار رکھا گیا ہے۔
ذرائع کا کہنا ہے کہ حکومت نے آئندہ ایک ہفتے کے لیے پیٹرول اور ڈیزل کی موجودہ قیمتیں برقرار رکھنے کا فیصلہ کیا ہے، اس لیے لیوی میں اضافے کا فوری اثر صارفین کے لیے قیمتوں میں اضافے کی صورت میں سامنے نہیں آئے گا۔
پیٹرولیم مصنوعات پر لیوی میں یہ اضافہ ایسے وقت میں کیا گیا ہے جب حکومت کو مالی اہداف کے حصول اور محصولات میں اضافے کے لیے مختلف اقدامات کا سامنا ہے۔
