سرگودھا کے علاقے جھال چکیاں میں پولیس نے ان 2 مشتبہ ملزمان کو گرفتار کر لیا ہے جنہوں نے مبینہ طور پر ایک نوجوان لڑکے کو اس وقت زندہ دفن کر دیا جب اس نے اپنے ساتھ ہونے والی جنسی زیادتی کے بارے میں اپنے گھر والوں کو بتایا۔
میڈیا رپورٹس کے مطابق ہفتے کے روز پیش آنیوالے اس خوفناک جرم کا انکشاف اس وقت ہوا جب ایک راہگیر نے زمین سے باہر نکلتا ہوا لڑکے کا ہاتھ دیکھا، جس پر مقامی لوگ جائے وقوعہ پر جمع ہو گئے۔
انہوں نے مٹی کھودنا شروع کی تو نوجوان تشویشناک حالت میں ملا، مقامی لوگوں نے پولیس کو اطلاع دی جس کے بعد لڑکے کو تشویشناک حالت میں اسپتال منتقل کر دیا گیا۔
یہ بھی پڑھیں: سرگودھا: 7 سالہ بچی زیادتی و قتل کیس کے مرکزی ملزم سمیت 4 گرفتار
ڈی پی او سرگودھا شعیب اشرف کے مطابق 14 سالہ لڑکے کو تقریباً 20 دن قبل جھال چکیاں کے علاقے میں 3 ملزمان نے مبینہ طور پر بدفعلی کا نشانہ بنایا تھا۔
انہوں نے بتایا کہ ملزمان نے لڑکے کو دھمکی دی تھی کہ اگر اس نے کسی کو اس واقعے کے بارے میں بتایا تو اسے سنگین نتائج کا سامنا کرنا پڑے گا۔
ابتدائی رپورٹس کے مطابق ڈی پی او نے بتایا کہ ملزمان کو بعد میں معلوم ہوا کہ لڑکے نے اپنے رشتہ داروں کو واقعے سے آگاہ کر دیا ہے اور ان کے نام بتا دیے ہیں۔
وقوعہ کا مقدمہ درج کرلیا گیا ھے۔ وقوعہ میں ملوث 2 ملزمان گرفتار ہیں۔ https://t.co/dr3yZFoF9u pic.twitter.com/VLhg4fabXl
— Sargodha Police (@sargodhapolice) June 26, 2026
انہوں نے مزید بتایا کہ ملزمان نے جمعہ کے روز لڑکے کو اغوا کیا اور اسے جھال چکیاں کے ایک سنسان علاقے میں زندہ دفن کر دیا۔
ڈی پی او کا کہنا تھا کہ پولیس نے 2 مرکزی ملزمان کا سراغ لگا کر مقدمہ درج کرنے کے بعد انہیں جیل بھیج دیا ہے، جبکہ تیسرے ملزم کی گرفتاری کے لیے پولیس کی ایک اور ٹیم روانہ کر دی گئی ہے۔
ڈی پی او نے مزید کہا کہ متاثرہ لڑکے کا بیان ریکارڈ کرنے کے بعد مزید قانونی کارروائی شروع کی جائے گی۔
مزید پڑھیں: معذور خواتین اور لڑکیاں آن لائن ہراسانی کا زیادہ نشانہ
یہ واقعہ سرگودھا میں ایک 7 سالہ بچی کے قتل کے چند دن بعد سامنے آیا ہے، جس کی ابتدائی پوسٹ مارٹم رپورٹ میں پولیس کے مطابق اس کے ساتھ زیادتی کی تصدیق ہوئی تھی۔
بدھ کے روز، سرگودھا پولیس نے بتایا تھا کہ اس کیس کا مرکزی ملزم، جو مبینہ طور پر پولیس کی حراست سے فرار ہو گیا تھا، کرائم کنٹرول ڈیپارٹمنٹ کے ساتھ ایک مقابلے کے دوران اپنے ہی ساتھیوں کی فائرنگ سے مارا گیا۔
