پاکستان نے کیمیائی ہتھیاروں کے کنونشن (CWC) پر مکمل اور مؤثر عمل درآمد کے عزم کا ایک بار پھر اعادہ کرتے ہوئے کیمیائی تحفظ، سیکیورٹی اور کیمسٹری کے پُرامن استعمال کے فروغ کے لیے عالمی تعاون جاری رکھنے کے عزم کا اظہار کیا ہے۔
پاکستان کی سیکریٹری خارجہ سفیر آمنہ بلوچ نے آج دفتر خارجہ میں کیمیائی ہتھیاروں کی ممانعت کی تنظیم (OPCW) کے دورۂ پاکستان پر آئے ہوئے وفد سے ملاقات کی اور اس موقع پر کیمیائی ہتھیاروں کے کنونشن (Chemical Weapons Convention) پر مکمل اور مؤثر عمل درآمد کے لیے پاکستان کے غیر متزلزل عزم کا اعادہ کیا۔
اس سے قبل ایڈیشنل سیکریٹری خارجہ اور ترجمان دفتر خارجہ، سفیر طاہر اندرابی نے وفد کو کیمیائی ہتھیاروں کے کنونشن پر پاکستان کے عمل درآمد، تخفیفِ اسلحہ اور عدم پھیلاؤ (Non-Proliferation) سے متعلق قومی ترجیحات، اور او پی سی ڈبلیو کے ساتھ پاکستان کے تعمیری تعاون کے بارے میں تفصیلی بریفنگ دی۔
دفتر خارجہ کے مطابق او پی سی ڈبلیو کا یہ وفد 16 ممالک سے تعلق رکھنے والے 19 ماہرین اور نمائندوں پر مشتمل ہے، جو 30 جون سے 2 جولائی 2026 تک اسلام آباد میں منعقد ہونے والے فورم آن دی پیس فل یوزز آف کیمسٹری میں شرکت کر رہے ہیں۔
یہ فورم پاکستان اور او پی سی ڈبلیو کے اشتراک سے کیمیائی ہتھیاروں کے کنونشن کے آرٹیکل XI کے تحت منعقد کیا جا رہا ہے، جس کا مقصد کیمیائی تحفظ و سلامتی، کیمیکلز کے مربوط انتظام، سائنسی تحقیق میں ذمہ دارانہ طرزِ عمل اور کیمسٹری کے پُرامن استعمال کے فروغ کے لیے بین الاقوامی تعاون کو مزید مضبوط بنانا ہے۔
فورم میں مختلف ممالک کے ماہرین اور علاقائی مندوبین شریک ہیں، جو کیمیائی شعبے میں محفوظ، ذمہ دارانہ اور پائیدار تعاون کے فروغ کے لیے اپنے تجربات اور تجاویز کا تبادلہ کر رہے ہیں۔
