وزیراعلیٰ پنجاب مریم نواز شریف نے کاہنہ میں ٹیوشن سینٹر کی چھت گرنے کے افسوسناک واقعے پر گہرے رنج و غم کا اظہار کرتے ہوئے جاں بحق ہونے والے معصوم بچوں کے اہل خانہ سے دلی تعزیت کی ہے۔
وزیراعلیٰ مریم نواز شریف نے ایکس پر اپنے بیان میں کہاکہ بطور ماں وہ متاثرہ والدین کی تکلیف اور اذیت کا بخوبی اندازہ کر سکتی ہیں، تاہم اس المناک سانحے پر اپنے جذبات کے اظہار کے لیے ان کے پاس الفاظ نہیں۔
The roof collapse at a tuition center in Kahna is a heartbreaking tragedy. The loss of 14 innocent lives is an immeasurable sorrow, and my heart goes out to the grieving families. As a mother, I deeply feel their pain and anguish. Words are simply not enough to express the…
— Maryam Nawaz Sharif (@MaryamNSharif) June 30, 2026
انہوں نے کہاکہ واقعے کی اطلاع ملتے ہی ریسکیو اور امدادی کارروائیاں فوری طور پر شروع کر دی گئی تھیں، جن کے نتیجے میں 20 بچوں کو بحفاظت نکال لیا گیا۔
انہوں نے کہاکہ 14 قیمتی جانوں کا ضیاع انتہائی المناک اور ناقابلِ تلافی سانحہ ہے، جس کا دکھ پوری قوم محسوس کر رہی ہے۔
وزیراعلیٰ پنجاب نے واضح کیاکہ اس افسوسناک سانحے کے ذمہ دار کسی بھی رعایت کے مستحق نہیں اور انہیں قانون کے شکنجے میں لایا جائے گا۔
انہوں نے واقعے کی مکمل، شفاف اور غیرجانبدارانہ تحقیقات کی ہدایت دیتے ہوئے کہاکہ غفلت یا کوتاہی کے مرتکب افراد کو قانون کے مطابق کیفرِ کردار تک پہنچایا جائے گا۔
مریم نواز شریف نے صوبے بھر کے سرکاری و نجی تعلیمی اداروں سمیت دیگر نجی عمارتوں کے حفاظتی معیار کا جامع جائزہ لینے کی بھی ہدایت جاری کی۔
انہوں نے کہا کہ مستقبل میں ایسے افسوسناک واقعات کی روک تھام کے لیے مربوط اور مؤثر حکمتِ عملی مرتب کی جائے گی تاکہ شہریوں، بالخصوص بچوں کی جانوں کا تحفظ یقینی بنایا جا سکے۔
واضح رہے کہ کاہنہ کے ایک گھر میں ٹیوشن سینٹر کی چھت گرنے سے 14 معصوم بچے جاں بحق ہوگئے، جبکہ ٹیچر سمیت 6 کو زندہ نکال لیا گیا۔
