مصنوعی ذہانت کی معروف کمپنی اوپن اے آئی کل (بروزجمعرات) اپنا اب تک کا جدید ترین ماڈل ’جی پی ٹی 5.6‘متعارف کرائے گی۔ اس ماڈل کی رونمائی گزشتہ ماہ امریکی حکومت کی درخواست پر قومی سلامتی سے متعلق خدشات کے باعث مؤخر کردی گئی تھی۔
رپورٹ کے مطابق امریکی حکام کو خدشہ تھا کہ انتہائی طاقتور مصنوعی ذہانت کے نظام چین، روس یا دیگر ممالک کی فوجی یا انٹیلیجنس سرگرمیوں میں غلط استعمال ہوسکتے ہیں، جس کے باعث ایسے ماڈلز کی جانچ پڑتال کا عمل مزید سخت کردیا گیا۔
یہ بھی پڑھیں: اوپن اے آئی نے امریکی حکومت کو 5فیصد شراکت کی تجویز کیوں دی؟
امریکی خبر رساں ادارے کے مطابق امریکی محکمہ تجارت نے اضافی حکومتی جانچ کے بعد ’جی پی ٹی 5.6‘ کی وسیع پیمانے پر رونمائی کی منظوری دے دی ہے۔ اس سے قبل اوپن اے آئی نے اس ماڈل تک رسائی صرف محدود اور منظور شدہ شراکت داروں کو فراہم کی تھی، جن کی تفصیلات حکام کے ساتھ بھی شیئر کی گئی تھیں۔
GPT-5.6 Sol, along with Terra and Luna, will launch publicly this Thursday.
We’re expanding preview access globally now. pic.twitter.com/Uk5HcfSc2e
— OpenAI (@OpenAI) July 8, 2026
اوپن اے آئی نے سماجی رابطے کی ویب سائٹ ’ایکس‘ پر اعلان کیا کہ کمپنی ’جی پی ٹی 5.6 سول‘ کے ساتھ ’ٹیرا‘ اور ’لونا‘ نامی 2 دیگر ماڈلز بھی پیش کرے گی۔
کمپنی کے مطابق ’سول‘ سب سے زیادہ جدید اور طاقتور ماڈل ہے، ’ٹیرا‘ نسبتاً کم لاگت والا درمیانی درجے کا ماڈل جبکہ ’لونا‘ سب سے کم لاگت والا ماڈل ہوگا۔
ادھر وائٹ ہاؤس اور امریکی محکمہ تجارت نے اس حوالے سے فوری طور پر کوئی تبصرہ نہیں کیا۔
یہ بھی پڑھیں: سپر ایپ کے تصور کی جانب بڑا قدم: اوپن اے آئی کا جی پی ٹی 5.5 ماڈل متعارف
واضح رہے کہ امریکی صدر ڈونلڈ ٹرمپ کے ایک انتظامی حکم کے بعد جدید مصنوعی ذہانت کے ماڈلز کی نگرانی کا نیا طریقۂ کار متعارف کرایا گیا، جس کے تحت کمپنیوں کو ایسے جدید ماڈلز عوامی اجرا سے قبل محدود مدت کے لیے امریکی حکومت کے جائزے کے لیے پیش کرنا ہوتا ہے۔
دوسری جانب مصنوعی ذہانت کی ایک اور معروف کمپنی اینتھروپک نے خبردار کیا ہے کہ کسی بھی مصنوعی ذہانت کے ماڈل کو مکمل طور پر حفاظتی خامیوں سے پاک بنانا شاید ممکن نہ ہو، اور مستقبل میں ایسا طریقہ سامنے آنے کا خدشہ موجود ہے جو حفاظتی پابندیوں کو بڑے پیمانے پر غیر مؤثر بنا سکے۔
