چیف جسٹس وفاقی آئینی عدالت نے عدالت کے افسران اور ملازمین کے لیے موسمِ گرما کی چھٹیوں کی منظوری دے دی ہے۔ چھٹیاں 2 مرحلوں میں دی جائیں گی، جبکہ عدالتی امور کی بلا تعطل انجام دہی اور زیر التوا سرکاری کام نمٹانے کے لیے بھی ہدایات جاری کی گئی ہیں۔
وفاقی آئینی عدالت نے افسران اور ملازمین کے لیے موسمِ گرما کی چھٹیوں کا شیڈول جاری کر دیا ہے۔ چیف جسٹس وفاقی آئینی عدالت کی منظوری کے مطابق ملازمین کو 3-3 ہفتوں پر مشتمل 2 الگ مرحلوں میں چھٹیاں دی جائیں گی۔
یہ بھی پڑھیں:سرکاری ملازمین کی سینیارٹی سے متعلق وفاقی آئینی عدالت نے بڑا فیصلہ سنا دیا
جاری کردہ شیڈول کے مطابق پہلے مرحلے کی چھٹیاں 13 جولائی سے 2 اگست 2026 تک ہوں گی، جبکہ دوسرے مرحلے میں افسران اور ملازمین 4 اگست سے 24 اگست 2026 تک موسمِ گرما کی چھٹیاں منائیں گے۔
عدالتی انتظامیہ نے تمام شعبہ جات کے سربراہان کو ہدایت کی ہے کہ چھٹیوں کے دوران بھی عدالتی اور دفتری امور بلا تعطل جاری رہنے چاہییں اور اس سلسلے میں ضروری انتظامات یقینی بنائے جائیں۔
نوٹیفکیشن کے مطابق تمام افسران اور ملازمین کو چھٹیوں پر روانہ ہونے سے قبل اپنی تمام زیر التوا فائلیں، سرکاری معاملات اور ضروری دفتری کام مکمل کرنے کی ہدایت کی گئی ہے۔
مزید برآں، تمام افسران اور ملازمین کو پابند کیا گیا ہے کہ چھٹیوں کے دوران اپنے رجسٹرڈ موبائل فون نمبر ہر وقت فعال رکھیں تاکہ ضرورت پڑنے پر ان سے فوری رابطہ کیا جا سکے۔
