نائب وزیراعظم و وزیر خارجہ سینیٹر اسحاق ڈار اور سعودی عرب کے وزیر خارجہ شہزادہ فیصل بن فرحان آل سعود کے درمیان ٹیلیفونک رابطہ ہوا ہے، جس میں دونوں رہنماؤں نے خطے کی تازہ ترین صورتحال اور حالیہ پیشرفت پر تبادلہ خیال کیا۔
ترجمان دفتر خارجہ کے مطابق ٹیلیفونک گفتگو کے دوران دونوں رہنماؤں نے امریکا اور ایران کے درمیان اسلام آباد مفاہمتی یادداشت پر دستخط کے باوجود خطے میں دوبارہ بڑھتی ہوئی کشیدگی پر گہری تشویش کا اظہار کیا۔
Deputy Prime Minister and Foreign Minister, Senator Mohammad Ishaq Dar @MIshaqDar50, held a telephonic conversation today with His Highness Prince Faisal bin Farhan Al Saud, Foreign Minister of the Kingdom of Saudi Arabia. @FaisalbinFarhan
The two leaders exchanged views on the… pic.twitter.com/t3GIB46LPD
— Ministry of Foreign Affairs – Pakistan (@ForeignOfficePk) July 11, 2026
دونوں وزرائے خارجہ کا کہنا تھا کہ تنازع کا دوبارہ شدت اختیار کرنا کسی کے مفاد میں نہیں اور اس سے خطے میں امن و استحکام کے لیے جاری کوششیں متاثر ہو رہی ہیں۔
سعودی وزیر خارجہ نے جاری سفارتی کوششوں سے متعلق سعودی عرب کا مؤقف بیان کرتے ہوئے کشیدگی میں کمی اور مسلسل مذاکرات کی اہمیت پر زور دیا۔
اس موقع پر نائب وزیراعظم و وزیر خارجہ اسحاق ڈار نے پاکستان کے اس مؤقف کا اعادہ کیاکہ تمام فریق زیادہ سے زیادہ تحمل کا مظاہرہ کریں اور ثالثی کی کوششوں کو کامیاب اور پرامن نتیجے تک پہنچانے کے لیے ضروری وقت اور سازگار ماحول فراہم کیا جائے۔
دونوں رہنماؤں نے خطے کی صورتحال کے تناظر میں ایک دوسرے سے قریبی رابطے میں رہنے اور مشاورت کا سلسلہ جاری رکھنے پر بھی اتفاق کیا۔
