پاکستان کی قومی ٹیسٹ کرکٹ ٹیم ویسٹ انڈیز کے خلاف 2 ٹیسٹ میچوں کی سیریز کھیلنے کے لیے اسلام آباد انٹرنیشنل ایئرپورٹ سے روانہ ہوگئی۔ قومی اسکواڈ اسلام آباد سے دوحہ اور لندن کے راستے ویسٹ انڈیز پہنچے گا، جہاں وہ آئی سی سی ورلڈ ٹیسٹ چیمپئن شپ کے اہم مقابلوں میں میزبان ٹیم کا سامنا کرے گا۔
دورہ ویسٹ انڈیز کے دوران پاکستان ٹیم ٹرینیڈاڈ اینڈ ٹوباگو کے دارالحکومت پورٹ آف اسپین اور ٹوروبا میں میچز کھیلے گی۔ قومی ٹیم سیریز سے قبل اپنی تیاریوں کو حتمی شکل دینے کے لیے 18 سے 21 جولائی تک 4 روزہ پریکٹس میچ بھی کھیلے گی، جس سے کھلاڑیوں کو مقامی کنڈیشنز سے ہم آہنگ ہونے کا موقع ملے گا۔
یہ بھی پڑھیے بابر اعظم ویسٹ انڈیز اور انگلینڈ کے خلاف ٹیسٹ ٹیم کے کپتان مقرر
روانگی سے قبل قومی ٹیسٹ اسکواڈ نے راولپنڈی کرکٹ اسٹیڈیم میں 3 روز تک بھرپور تربیتی کیمپ میں حصہ لیا۔ اس دوران کھلاڑیوں نے بیٹنگ، بولنگ اور فیلڈنگ کی مشقوں کے ساتھ 2 روزہ سیناریو بیسڈ پریکٹس میچ بھی کھیلا، جس کا مقصد مختلف میچ صورتحال میں کھلاڑیوں کی تیاری کو مزید بہتر بنانا تھا۔
پاکستان اور ویسٹ انڈیز کے درمیان آئی سی سی ورلڈ ٹیسٹ چیمپئن شپ کے تحت 2 ٹیسٹ میچز 25 جولائی سے 10 اگست کے دوران کھیلے جائیں گے۔ سیریز کے میچز برائن لارا کرکٹ اکیڈمی، ٹوروبا اور کوئینز پارک اوول، پورٹ آف اسپین میں شیڈول ہیں۔
یہ بھی پڑھیے شان مسعود کی کپتانی کیوں ختم کی گئی؟ عاقب جاوید نے وجہ بتا دی
قومی ٹیم اس دورے میں عمدہ کارکردگی کے ذریعے نہ صرف سیریز اپنے نام کرنے بلکہ ورلڈ ٹیسٹ چیمپئن شپ میں قیمتی پوائنٹس حاصل کرنے کے عزم کے ساتھ میدان میں اترے گی۔
