نئی دہلی میں گھریلو تنازع نے ایک افسوسناک رخ اختیار کر لیا جہاں دہلی پولیس کے ایک کانسٹیبل نے مبینہ طور پر معمولی تلخ کلامی کے بعد اپنی اہلیہ کو سڑک کے درمیان گولی مار کر قتل کر دیا۔
پولیس کے مطابق ملزم کانسٹیبل منیش بھاٹی نے پیر کی صبح دہلی کے علاقے کلین پور میں اپنی 26 سالہ اہلیہ پریانکا کو فائرنگ کر کے شدید زخمی کر دیا اور موقع سے فرار ہو گیا۔
واقعے کے وقت دونوں میاں بیوی موٹر سائیکل پر جا رہے تھے کہ راستے میں کسی معاملے پر ان کے درمیان بحث شروع ہو گئی۔ چشم دید گواہوں کے مطابق تلخ کلامی بڑھنے پر منیش بھاٹی نے موٹر سائیکل روک دی اور سڑک کے درمیان ہی اپنی اہلیہ پر فائر کر دیا۔
گولی لگنے کے بعد پریانکا شدید زخمی حالت میں سڑک پر گر گئی جبکہ ملزم اسے وہیں چھوڑ کر فرار ہو گیا۔
واقعے کے بعد ایک راہگیر نے سڑک کنارے زخمی خاتون کو دیکھا اور فوری طور پر اسے لال بہادر شاستری اسپتال، نئی دہلی منتقل کیا گیا، تاہم ڈاکٹروں کی کوششوں کے باوجود وہ دورانِ علاج جانبر نہ ہو سکی۔
پولیس نے لاش کو پوسٹ مارٹم کے لیے منتقل کر دیا ہے اور واقعے کی تحقیقات شروع کر دی گئی ہیں۔
پولیس کے مطابق مقتولہ پریانکا ایک اسکول میں بطور ٹیچر کام کرتی تھیں۔ افسوسناک امر یہ ہے کہ واقعے کا دن ہی ان کی سالگرہ کا دن تھا، جو خوشی کے موقع کے بجائے ان کی زندگی کا آخری دن ثابت ہوا۔
واقعے نے مقامی لوگوں میں شدید غم و غصہ پیدا کر دیا ہے، جبکہ خواتین کے تحفظ اور گھریلو تشدد کے مسئلے پر بھی سوالات اٹھائے جا رہے ہیں۔
دہلی پولیس کے مطابق منیش بھاٹی کو حال ہی میں اینٹی آٹو تھیفٹ اسکواڈ (AAIT) میں تعینات کیا گیا تھا، جہاں اس کی ذمہ داری گاڑیوں کی چوری کی روک تھام اور چوری شدہ گاڑیوں کی برآمدگی سے متعلق تھی۔
پولیس کا کہنا ہے کہ ملزم واقعے کے بعد فرار ہے اور اسے گرفتار کرنے کے لیے مختلف مقامات پر چھاپے مارے جا رہے ہیں۔
حکام کے مطابق واقعے کے تمام پہلوؤں کا جائزہ لیا جا رہا ہے، جبکہ قتل کی وجوہات جاننے کے لیے اہل خانہ اور دیگر گواہوں سے بھی پوچھ گچھ کی جا رہی ہے۔
