وزیراعظم شہباز شریف نے ترسیلات زر کو 100 فیصد ڈیجیٹل بنانے کی ہدایت کرتے ہوئے کیش لیس معیشت کے فروغ پر زور دیا ہے۔
وزیراعظم محمد شہباز شریف کی زیرِ صدارت کیش لیس معیشت اور ڈیجیٹل ادائیگیوں کے فروغ سے متعلق اجلاس اسلام آباد میں منعقد ہوا، جس میں ملک میں ڈیجیٹل لین دین کے فروغ اور نقدی کے استعمال میں کمی کے اقدامات کا جائزہ لیا گیا۔
وزیراعظم نے گزشتہ ایک سال کے دوران پاکستان کی معیشت کو ڈیجیٹل ادائیگیوں پر مبنی کیش لیس نظام کی طرف منتقل کرنے میں پیش رفت پر معاشی ٹیم کی کارکردگی کو سراہا۔
یہ بھی پڑھیں: ڈیجیٹل معیشت کے فروغ کے لیے ٹیلی کمیونیکیشن قوانین میں اصلاحات ضروری، شزا فاطمہ
اجلاس سے خطاب کرتے ہوئے وزیراعظم شہباز شریف نے کہا کہ ملکی معیشت کو کیش لیس نظام پر منتقل کرنے سے پائیدار معاشی ترقی کو فروغ ملے گا اور شفافیت میں اضافہ ہوگا۔
وزیراعظم نے ڈیجیٹل ادائیگیوں کے لیے کیو آر کوڈ استعمال کرنے والے فعال تاجروں کی تعداد میں ایک سال کے دوران 300 فیصد اضافے پر معاشی ٹیم کو خراجِ تحسین پیش کیا۔
انہوں نے ہدایت کی کہ تاجروں کو کیو آر کوڈ کے ذریعے ڈیجیٹل ادائیگیوں کی جانب راغب کرنے کے لیے آگاہی مہم مزید مؤثر بنائی جائے، جبکہ بیرون ملک سے آنے والی ترسیلاتِ زر کو 100 فیصد ڈیجیٹل بنایا جائے۔
وزیراعظم نے کہا کہ موبائل بینکنگ ایپ استعمال کرنے والوں کی تعداد ایک سال میں 9 کروڑ 50 لاکھ سے بڑھ کر 13 کروڑ 70 لاکھ ہونا ایک اہم کامیابی ہے۔ انہوں نے بینکوں اور مالیاتی اداروں پر زور دیا کہ وہ کیش لیس معیشت کے فروغ میں اپنا بھرپور کردار ادا کریں۔
یہ بھی پڑھیں: پاکستان ڈیجیٹل معیشت میں بڑی تبدیلی کی راہ پر گامزن ہے، وزیراعظم شہباز شریف
وزیراعظم نے بے نظیر انکم سپورٹ پروگرام کی ادائیگیوں کو ڈیجیٹل نظام پر منتقل کرنے کے اقدام کو شفاف، تیز رفتار اور مستحقین کے لیے سہل قرار دیتے ہوئے سراہا۔
اجلاس میں دی گئی بریفنگ کے دوران بتایا گیا کہ جون 2025 سے جون 2026 تک ڈیجیٹل طریقے سے ادائیگیاں وصول کرنے والے تاجروں کی تعداد میں 300 فیصد اضافہ ہوا اور یہ تعداد بڑھ کر 20 لاکھ 3 ہزار تک پہنچ گئی ہے۔
بریفنگ میں بتایا گیا کہ نادرا کی 99 فیصد ادائیگیاں ڈیجیٹل ہو چکی ہیں، جبکہ نقد ادائیگیوں کا تناسب 71 فیصد سے کم ہو کر صرف ایک فیصد رہ گیا ہے۔
اجلاس کو بتایا گیا کہ بے نظیر انکم سپورٹ پروگرام کے ایک کروڑ صارفین کو تمام ادائیگیاں ڈیجیٹل بٹووں کے ذریعے کی جا رہی ہیں، جبکہ موبائل بینکنگ ایپ صارفین کی تعداد 13 کروڑ 70 لاکھ تک پہنچ چکی ہے۔
یہ بھی پڑھیں: اقتصادی پیشرفت کے لیے ڈیجیٹل معیشت اہمیت کی حامل ہے، وزیرخزانہ محمداورنگزیب
بریفنگ میں مزید بتایا گیا کہ جولائی 2025 سے جون 2026 کے دوران 11 ارب 90 کروڑ ڈیجیٹل لین دین ریکارڈ کیے گئے، جبکہ گزشتہ سال کے دوران بیرون ملک سے آنے والی ترسیلاتِ زر کا 92 فیصد حصہ ڈیجیٹل طریقے سے موصول ہوا۔
اجلاس کو آگاہ کیا گیا کہ کیش لیس معیشت کے حوالے سے تیسرے فریق کی جانچ جاری ہے، جس کی حتمی رپورٹ سفارشات کے ساتھ نومبر 2026 میں پیش کی جائے گی۔
پاکستان بینکنگ ایسوسی ایشن نے اپنے رکن بینکوں کو ڈیجیٹل ادائیگیوں، بشمول راست نظام کے فروغ کے لیے اہداف بھی دیے ہیں۔
اجلاس میں وفاقی وزرا احد خان چیمہ، محمد اورنگزیب، عطاء اللہ تارڑ، شزا فاطمہ خواجہ، علی پرویز ملک، وزیر مملکت برائے خزانہ بلال اظہر کیانی، اسٹیٹ بینک کے گورنر جمیل احمد، چیئرمین نادرا اور متعلقہ اداروں کے اعلیٰ حکام نے شرکت کی۔
