سینیگال فٹبال فیڈریشن نے فیفا ورلڈکپ میں قومی ٹیم کی مایوس کن کارکردگی کا جائزہ لیتے ہوئے ٹیم کے ڈاکٹر کی اہلیت پر سوالات اٹھا دیے ہیں، تاہم اسپورٹس میڈیسن ایسوسی ایشن نے ان الزامات کو بے بنیاد اور توہین آمیز قرار دیتے ہوئے مسترد کر دیا ہے۔
سینیگال فٹبال فیڈریشن کا کہنا ہے کہ قومی ٹیم کے ڈاکٹر عبدالرحمان فیدیور کے پاس ٹورنامنٹ کے دوران کھلاڑیوں کی مؤثر طبی دیکھ بھال کے لیے مطلوبہ مہارت موجود نہیں تھی۔ فیڈریشن کے مطابق ڈاکٹر فیدیور نے اسپورٹس میڈیسن میں تربیت حاصل نہیں کی بلکہ وہ امراضِ نسواں (گائناکالوجی) کے ماہر ہیں۔
یہ بھی پڑھیے کیا فیفا واقعی ارجنٹینا کو فائدہ پہنچا رہا ہے؟ 4 متنازع فیصلوں نے نئی بحث چھیڑ دی
یہ بیان فیڈریشن کی جانب سے ورلڈکپ میں ٹیم کی کارکردگی کے حوالے سے کیے گئے جائزے کے دوران سامنے آیا۔ سینیگال کی ٹیم راؤنڈ آف 32 کے ناک آؤٹ مرحلے میں بیلجیئم کے ہاتھوں 2-3 سے شکست کے بعد ٹورنامنٹ سے باہر ہو گئی تھی۔
رپورٹس کے مطابق ڈاکٹر عبدالرحمان فیدیور 2017 سے سینیگال کی قومی فٹبال ٹیم کے ساتھ وابستہ ہیں۔ ان کے دور میں ٹیم نے 3 فیفا ورلڈکپ اور 5 افریقا کپ آف نیشنز ٹورنامنٹس میں شرکت کی۔
اسپورٹس میڈیسن ایسوسی ایشن کا دفاع
دوسری جانب سینیگال اسپورٹس میڈیسن ایسوسی ایشن نے فٹبال فیڈریشن کے الزامات کو مسترد کرتے ہوئے کہا ہے کہ ڈاکٹر عبدالرحمان فیدیور کے خلاف کیے گئے دعوے حقائق کے برعکس اور ان کی توہین کے مترادف ہیں۔
یہ بھی پڑھیے فیفا ورلڈ کپ کی تاریخ میں نیا حیران کن منفرد ریکارڈ کیا ہے؟
ایسوسی ایشن کا کہنا ہے کہ ڈاکٹر فیدیور اسپورٹس میڈیسن کے ماہر ہیں اور ان کی پیشہ ورانہ صلاحیتوں پر سوال اٹھانا درست نہیں۔
ہیڈ کوچ پاپ بونا تھیاؤ بھی عہدے سے فارغ
دریں اثنا سینیگال فٹبال فیڈریشن نے قومی ٹیم کے ہیڈ کوچ پاپ بونا تھیاؤ کو بھی عہدے سے برطرف کر دیا ہے۔
فیڈریشن کے مطابق ورلڈکپ میں ٹیم کی توقعات کے مطابق کارکردگی نہ دکھانے کے باعث کوچنگ عملے میں تبدیلی کا فیصلہ کیا گیا۔ سینیگال ٹیم ورلڈکپ میں ناک آؤٹ مرحلے تک پہنچی، تاہم بیلجیئم کے خلاف شکست کے بعد اس کا سفر اختتام پذیر ہو گیا تھا۔
