پنجاب اسمبلی کے ینگ پارلیمنٹیرینز فورم نے پاکستان اور چین کے درمیان سفارتی تعلقات کے 75 سال مکمل ہونے کی مناسبت سے لاہور میں قائم چینی قونصل خانے کے نوجوان سفارت کاروں کے اعزاز میں ایک خصوصی تقریب کا انعقاد کیا۔
تقریب کے دوران اس تاریخی دوستی کو نئی نسل کے قائدین کے ذریعے مستقبل میں بھی مضبوطی سے آگے بڑھانے کے مشترکہ عزم کا اعادہ کیا گیا۔
تقریب کی صدارت اسپیکر پنجاب اسمبلی ملک محمد احمد خان نے کی، جبکہ عوامی جمہوریہ چین کے لاہور میں قونصل جنرل مسٹر سن یان نے بطور مہمانِ خصوصی شرکت کی۔
تقریب کا انعقاد ینگ پارلیمنٹیرینز فورم کی صدر آمنہ حسن شیخ کی قیادت میں کیا گیا۔
اس موقع پر فورم کے اس وژن کو اجاگر کیا گیا کہ نوجوان ارکانِ پارلیمنٹ اور نوجوان سفارت کاروں کے درمیان بامقصد روابط کو فروغ دے کر پارلیمانی سفارت کاری کو مزید مستحکم بنایا جائے۔
تقریب میں اس بات پر زور دیا گیا کہ پاکستان اور چین کے درمیان لازوال دوستی کے 75 برس مکمل ہونے کے موقع پر نئی نسل کی یہ ذمہ داری ہے کہ وہ اس تاریخی شراکت داری کو محفوظ رکھے، مزید مضبوط بنائے اور آنے والی کئی دہائیوں تک اسے اسی جذبے کے ساتھ آگے بڑھائے۔
