برطانوی شہزادہ ہیری نے انکشاف کیا ہے کہ شاہی خاندان سے تعلق رکھنے کے باوجود انہیں اسکول کے زمانے میں اپنے بالوں کے رنگ کی وجہ سے مذاق اور تنقید کا سامنا کرنا پڑتا تھا۔
یہ بھی پڑھیں: شہزادہ ہیری اور برطانوی شاہی خاندان کے درمیان برف پگھلنے کی امید، شاہ چارلس اور ہیری کی ملاقات متوقع
ڈیوک آف سسیکس حال ہی میں کامیڈین جو مارلر کے پوڈکاسٹ ’وِل سی یو ناؤ‘ میں شریک ہوئے جہاں ان سے پوچھا گیا کہ لوگ ان کے بارے میں سب سے زیادہ کیا غلط سمجھتے ہیں۔
شہزادہ ہیری نے جواب دیا کہ بہت سے لوگ سمجھتے ہیں کہ ان کے بالوں کا رنگ صرف سرخی مائل ہے جبکہ حقیقت میں یہ ’غروب آفتاب کے نارنجی رنگ جیسا یا آبرن (سرخی مائل بھورا)‘ ہے۔
جب پوڈکاسٹ کے میزبان نے اس بات پر ہنسی روکنے کی کوشش کی تو ہیری نے مذاق میں کہا کہ لوگ انہیں ’جنچ‘ کہہ سکتے ہیں لیکن پھر انہوں نے اپنے اسکول کے دنوں کا ذکر کرتے ہوئے بتایا کہ انہیں بالوں کے رنگ کی وجہ سے کافی تنگ کیا جاتا تھا۔
انہوں نے کہا کہ مجھے اسکول میں بہت تنگ کیا گیا مجھے ’کیروٹ ٹاپ‘ (گاجر جیسا سرخ بالوں والا) کہا جاتا تھا۔
مزید پڑھیے: برطانوی شاہی خاندان کی سابق رکن سارہ فرگوسن آسٹریلیا جانے کی خواہشمند لیکن سانپوں کا خوف آڑے
میزبان جو مارلر نے جواب دیتے ہوئے کہا کہ انہیں سمجھ نہیں آتا کہ لوگ اس بات پر کیوں مذاق کرتے تھے جبکہ ہیری نے ہنستے ہوئے کہا کہ مجھے لگتا ہے اس کے بعد مجھے تھراپی کی ضرورت ہوگی۔
ہیری اسٹائلز، ہیری کین یا ہیری پوٹر؟
پوڈکاسٹ میں شہزادہ ہیری سے پوچھا گیا کہ اگر انہیں ایک دن کے لیے کسی اور ’ہیری‘ کی زندگی گزارنے کا موقع ملے تو وہ کس کا انتخاب کریں گے؟
انہوں نے کہا کہ وہ فٹبالر ہیری کین بننا پسند کریں گے لیکن صرف اس دن جب وہ کامیابی حاصل کر رہے ہوں۔
ہیری نے مزاحیہ انداز میں کہا کہ آپ ہیری کین کی زندگی شکست والے دن تو نہیں گزارنا چاہیں گے، ہے نا؟
میگھن مارکل کے جینز سے متعلق دلچسپ بات
شہزادہ ہیری نے اپنی اہلیہ میگھن مارکل کے ساتھ تعلق کے ابتدائی دنوں کا ذکر کرتے ہوئے کہا کہ انہیں یقین تھا کہ اگر ان کے بچے ہوئے تو شاید ان کے سرخ بالوں والے جینز میگھن کے جینز کے سامنے غالب نہیں آ سکیں گے۔
انہوں نے کہا کہ میں نے واقعی سوچا تھا کہ اگر ہمارا رشتہ کامیاب رہا اور ہمارے بچے ہوئے تو میرے سرخ بالوں والے جینز کے مقابلے میں میری اہلیہ کے جینز غالب آ جائیں گے لیکن میں غلط ثابت ہوا۔
مزید پڑھیں: برطانوی شاہی خاندان کے افراد کونسے کھانے کھاتے ہیں اور کن کھانوں کو ہاتھ نہیں لگاتے؟
شہزادہ ہیری اور میگھن مارکل کے بچوں خاص طور پر ان کے بیٹے شہزادہ آرچی اور بیٹی شہزادی لیلی بیٹ کے بالوں کے رنگ کو بھی ماضی میں عوامی دلچسپی کا موضوع بنایا جاتا رہا ہے۔
