برطانیہ سے تعلق رکھنے والے عالمی شہرت یافتہ باکسر عامر خان نے لیاری کا دورہ کیا، جہاں انہوں نے فیفا ورلڈ کپ کے سیمی فائنل فرانس اور اسپین کے درمیان ہونے والے مقابلے کا لطف مقامی شائقین کے ساتھ اٹھایا۔ اس موقع پر لیاری کے گراؤنڈ میں بڑی اسکرین نصب کی گئی تھی، جبکہ فٹبال کے دیوانوں کی بڑی تعداد اپنے پسندیدہ کھیل سے محبت کا اظہار کرنے کے لیے موجود تھی۔
وی نیوز سے خصوصی گفتگو کرتے ہوئے عامر خان نے کہا کہ انہیں اندازہ نہیں تھا کہ لیاری میں فٹبال کے لیے لوگوں کا جذبہ اس قدر زیادہ ہے۔ انہوں نے کہا کہ سوشل میڈیا اور میڈیا رپورٹس میں لیاری کے فٹبال کلچر کے بارے میں سنا تھا، تاہم یہاں آ کر وہ اس جوش و خروش کو دیکھ کر بے حد متاثر ہوئے ہیں۔
یہ بھی پڑھیں: باکسر عامر خان پاک فوج کے اعزازی کیپٹن بن گئے، خوشی سے نہال
انہوں نے کہا کہ لیاری صرف فٹبال ہی نہیں بلکہ باکسنگ کے میدان میں بھی بے پناہ صلاحیتوں کا حامل علاقہ ہے۔ ان کے مطابق سابق قومی باکسنگ چیمپیئن نادر بلوچ سمیت متعدد باصلاحیت کھلاڑی اسی علاقے سے تعلق رکھتے ہیں، جنہیں مزید مواقع اور سہولیات فراہم کرنے کی ضرورت ہے۔
عامر خان نے کہا کہ نوجوانوں کو مثبت سرگرمیوں کی جانب راغب کرنے کے لیے کھیلوں کے فروغ پر توجہ دینا ناگزیر ہے۔ انہوں نے لیاری میں باکسنگ اکیڈمی قائم کرنے کے امکان کا بھی اظہار کرتے ہوئے کہا کہ اگر نوجوانوں کو مناسب تربیت اور سہولیات فراہم کی جائیں تو وہ عالمی سطح پر پاکستان کا نام روشن کر سکتے ہیں۔
خواتین کے کھیلوں میں بڑھتے ہوئے کردار پر بات کرتے ہوئے عامر خان نے کہا کہ لیاری کی لڑکیوں کو بھی آگے بڑھنے کے یکساں مواقع ملنے چاہییں۔ انہوں نے کہا کہ اگر خواتین کھلاڑیوں کو مناسب تربیت اور مواقع دیے جائیں تو وہ بھی عالمی چیمپیئن بن سکتی ہیں۔
یہ بھی پڑھیں: باکسر عامر خان پر 2سال کے لیے ہر قسم کا کھیل کھیلنے پر پابندی
فیفا ورلڈ کپ کے سیمی فائنل کے حوالے سے عامر خان نے اسپین کو اپنی پسندیدہ ٹیم قرار دیا، جبکہ انگلینڈ اور ارجنٹینا کے درمیان دوسرے سیمی فائنل میں انگلینڈ کی کامیابی کی پیش گوئی کی۔ انہوں نے امید ظاہر کی کہ فائنل اسپین اور انگلینڈ کے درمیان ہوگا۔
واضح رہے کہ لیاری کو پاکستان میں فٹبال کا گڑھ تصور کیا جاتا ہے، جہاں ہر بڑے عالمی ٹورنامنٹ کے دوران شائقین کی بڑی تعداد میچز دیکھنے کے لیے جمع ہوتی ہے اور اپنے پسندیدہ کھلاڑیوں اور ٹیموں سے والہانہ محبت کا اظہار کرتی ہے۔
