نائب وزیراعظم و وزیر خارجہ سینیٹر محمد اسحاق ڈار سے اقوام متحدہ کے انسانی ہمدردی کے امور اور ہنگامی امداد کے رابطہ کار ٹام فلیچر نے ملاقات کی، جس میں انسانی امداد، علاقائی امن اور باہمی تعاون سے متعلق امور پر تبادلہ خیال کیا گیا۔
یہ بھی پڑھیں: اسحاق ڈار سے اقوام متحدہ سیکریٹری جنرل کی امیدوار کی ملاقات، اہم امور پر تبادلہ خیال
ترجمان دفتر خارجہ کے مطابق اسحاق ڈار نے آفس برائے رابطہ انسانی امور کی جانب سے دنیا بھر میں قدرتی آفات اور تنازعات سے متاثرہ افراد کو انسانی امداد کی فراہمی میں ادا کیے جانے والے کردار کو سراہا۔
انہوں نے پاکستان میں موسمیاتی تبدیلیوں سے پیدا ہونے والی قدرتی آفات کے دوران ادارے کی خدمات کی بھی تعریف کی۔
یہ بھی پڑھیں: پاکستان عالمی مصنوعی ذہانت تعاون تنظیم کا بانی رکن بنے گا، اسحاق ڈار شنگھائی میں معاہدے پر دستخط کریں گے
نائب وزیراعظم نے کہا کہ پاکستان انسانی ہمدردی کے امور کے ادارے کی اہم ذمہ داریوں، خصوصاً مقبوضہ فلسطینی علاقوں میں انسانی بحران سے نمٹنے کی کوششوں کی مکمل حمایت جاری رکھے گا۔
ملاقات کے دوران ٹام فلیچر نے خطے میں امن و استحکام کے لیے پاکستان کی مسلسل کوششوں کو سراہتے ہوئے اقوام متحدہ کے لیے پاکستان کی گراں قدر خدمات اور کردار کی بھی تعریف کی۔
