وزیر اطلاعات پنجاب عظمیٰ بخاری نے کہا ہے کہ شیخوپورہ کے مقامی ‘گلستان تھیٹر’ میں سٹیج اداکارہ پر دورانِ ڈرامہ تشدد کرنے والے ملزم راجہ زین کو گرفتار کر لیا گیا ہے۔ صوبائی وزیر اطلاعات نے اپنے آفیشل بیان کے ساتھ گرفتار ملزم کی تصویر بھی شیئر کی ہے۔
عظمیٰ بخاری کا کہنا تھا کہ واقعے کی تفتیش تیزی سے جاری ہے اور ملزم کے خلاف قانون کے مطابق سخت کارروائی عمل میں لائی جائے گی۔ انہوں نے واضح کیا کہ اگرچہ ملزم نے ضمانت قبل از گرفتاری کروا لی ہے، تاہم پنجاب حکومت کی جانب سے ملزم راجہ زین کی ضمانت منسوخی کے لیے فوری طور پر قانونی اقدامات کیے جا رہے ہیں۔
یہ بھی پڑھیں:عظمیٰ بخاری کی پنجاب اسمبلی میں پی ٹی آئی پر تنقید، سوشل میڈیا الزامات کا جواب دے دیا
وزیر اطلاعات نے اس بات پر سخت زور دیا کہ تھیٹرز میں کام کرنے والے تمام اداکاروں کو مکمل سیکیورٹی اور تحفظ فراہم کرنا بنیادی طور پر تھیٹر مالکان کی ذمہ داری ہے۔
انہوں نے مزید کہا کہ خواتین کے ساتھ بدسلوکی، تشدد یا ان کی تضحیک کے ایسے واقعات کسی بھی صورت ناقابلِ برداشت ہیں اور کسی کو بھی قانون ہاتھ میں لینے کی اجازت نہیں دی جائے گی۔
