امریکی وزیر خارجہ مارکو روبیو نے کہا ہے کہ ایران خطے میں جاری کشیدگی کے دوران آبنائے ہرمز کو دباؤ کے ایک ذریعے کے طور پر استعمال کر رہا ہے۔ انہوں نے عالمی برادری پر زور دیا کہ وہ اہم بحری گزرگاہ سے تجارتی جہازوں کے محفوظ گزر کو یقینی بنانے کے لیے امریکا کے ساتھ ذمہ داری بھی بانٹے۔
خبر رساں ادارے اے ایف پی کے مطابق فلپائن روانگی سے قبل صحافیوں سے گفتگو کرتے ہوئے مارکو روبیو نے کہا کہ امریکا عالمی بحری راستوں اور تجارتی جہازوں کے تحفظ کے لیے اپنی کارروائیاں جاری رکھے گا، تاہم اس ذمہ داری کا بوجھ صرف امریکا پر نہیں ہونا چاہیے۔
انہوں نے کہا کہ دیگر ممالک کو بھی اس مشترکہ ذمہ داری میں حصہ ڈالنا چاہیے اور اس مقصد کے لیے فوجی سازوسامان، بحری وسائل یا مالی معاونت فراہم کرنی چاہیے تاکہ عالمی بحری تجارت کے تحفظ کی ذمہ داری مشترکہ طور پر ادا کی جا سکے۔
مارکو روبیو کا کہنا تھا کہ آبنائے ہرمز دنیا کی اہم ترین تجارتی گزرگاہوں میں شامل ہے، اس لیے اس کے محفوظ اور بلا تعطل استعمال کو یقینی بنانا پوری عالمی برادری کی مشترکہ ذمہ داری ہے۔
