وزیراعظم محمد شہباز شریف اور صدر مملکت آصف علی زرداری نے اینڈی برنہم کو برطانیہ کا وزیراعظم کا عہدہ سنبھالنے پر مبارکباد دی ہے اور ان کے لیے نیک خواہشات کا اظہار کیا ہے۔
یہ بھی پڑھیں: برطانیہ کو سرکٹ بریکر کی ضرورت ہے، نئے وزیراعظم اینڈی برنہم کا پہلا خطاب، مہنگائی میں ریلیف کا اعلان
وزیراعظم شہباز شریف نے اپنے ایک بیان میں کہا کہ وہ امید کرتے ہیں کہ وزیراعظم اینڈی برنہم کے دور میں پاکستان اور برطانیہ کے درمیان تاریخی اور گہرے دوستانہ تعلقات مزید مضبوط ہوں گے۔ انہوں نے اس بات پر زور دیا کہ دونوں ممالک کے خصوصی تعلقات کی اصل بنیاد برطانیہ میں آباد لاکھوں محنتی اور متحرک پاکستانی نژاد شہری ہیں، جو دونوں ملکوں کے درمیان ایک مضبوط پل کا کردار ادا کر رہے ہیں۔
وزیراعظم نے عزم ظاہر کیا کہ پاکستان اور برطانیہ مل کر دوطرفہ تعلقات، بالخصوص تجارت اور سرمایہ کاری کے شعبے میں تعاون کو نئی بلندیوں تک لے جانے کے لیے کام کریں گے۔
Heartiest congratulations to @andyburnham on assuming office as Prime Minister of the United Kingdom.
I wish Prime Minister Andy Burnham every success in his tenure and look forward to working closely with him to further strengthen the historic and deep-rooted bonds of…
— Shehbaz Sharif (@CMShehbaz) July 20, 2026
دوسری جانب صدر مملکت آصف علی زرداری نے بھی برطانوی وزیراعظم اینڈی برنہم کو نئی ذمہ داریاں سنبھالنے پر مبارکباد پیش کی ہے۔ صدر مملکت نے امید ظاہر کی کہ وزیراعظم اینڈی برنہم کی قیادت میں پاکستان اور برطانیہ کے درمیان دوطرفہ شراکت داری اور پائیدار تعلقات مزید مستحکم ہوں گے۔
یہ بھی پڑھیں: 10 ڈاؤننگ اسٹریٹ کی ’افسر‘ بلی کی جانب سے نئے وزیراعظم اینڈی برنہم کا استقبال، اپنی پسند ناپسند سے بھی آگاہ کردیا
اس موقع پر صدر مملکت نے مذاکرات، سفارت کاری اور تنازعات کے پُرامن حل کے لیے پاکستان کے غیر متزلزل عزم کا اعادہ کیا اور اس عزم کو دہرایا کہ پاکستان نے ہمیشہ برادر اور دوست ملکوں کے تعاون سے خطے اور دنیا بھر میں قیامِ امن کے فروغ کے لیے کلیدی کردار ادا کیا ہے۔
