کوئٹہ کے ایک رہائشی کے ہاں ایک ہی وقت میں 5 بچوں کی پیدائش ہوئی ہے، جس کے بعد اہلِ خانہ میں خوشی کی لہر دوڑ گئی اور یہ منفرد واقعہ شہر بھر میں بھی توجہ کا مرکز بن گیا۔
ڈاکٹروں کے مطابق پیدا ہونے والے پانچ بچوں میں 3 بیٹیاں اور 2 بیٹے شامل ہیں۔ خاندان میں پہلے سے 3 بچے موجود تھے، جبکہ 5 نومولود کی آمد کے بعد بچوں کی مجموعی تعداد 8 ہو گئی ہے۔
یہ بھی پڑھیں: صوابی میں خاتون کے ہاں بیک وقت 4 بچوں کی پیدائش
پانچوں بچوں کی پیدائش کوئٹہ کے ایک نجی اسپتال میں ماہر ڈاکٹروں کی نگرانی میں ہوئی، جہاں زچگی کا عمل کامیابی سے مکمل کیا گیا۔
اسپتال انتظامیہ کے مطابق ایک ہی زچگی میں 5 بچوں کی پیدائش ایک غیر معمولی طبی معاملہ ہوتا ہے، جس کے باعث نومولود بچوں کی خصوصی دیکھ بھال ناگزیر ہوتی ہے۔
ڈاکٹروں کا کہنا ہے کہ احتیاطی تدابیر کے طور پر پانچوں نومولود بچوں کو 10 روز تک خصوصی نگہداشت میں رکھا جائے گا تاکہ ان کی صحت، وزن اور نشوونما کا مسلسل جائزہ لیا جا سکے۔
مزید پڑھیں: کراچی میں خوش نصیب جوڑے کے ہاں بیک وقت پانچ بچوں کی پیدائش
طبی ماہرین کے مطابق اس دوران بچوں کی ضروری طبی نگرانی جاری رہے گی۔
ڈاکٹروں نے بتایا کہ ابتدائی معائنے کے مطابق پانچوں بچوں کی مجموعی حالت تسلی بخش ہے، جبکہ والدہ کی صحت بھی بہتر بتائی جا رہی ہے۔
