بالی ووڈ کے معروف اداکار امیتابھ بچن نے اپنی حالیہ سوشل میڈیا پوسٹ میں سرجری کا ذکر سامنے آنے کے بعد پھیلنے والی خبروں کی وضاحت کرتے ہوئے کہا ہے کہ ان کی کوئی سرجری نہیں ہوئی اور وہ بالکل خیریت سے ہیں۔
ایک انٹرویو میں 83 سالہ اداکار نے کہا کہ ان کی پوسٹ کو غلط سمجھا گیا۔ انہوں نے وضاحت کی کہ وہ اسپتال، سرجری اور انتہائی نگہداشت کے بعد کے مشکل وقت کی مثال دے رہے تھے، نہ کہ اپنی صحت کے بارے میں بات کررہے تھے۔
یہ بھی پڑھیں: امیتابھ بچن کی اسپتال سے پراسرار پوسٹ، مداحوں میں تشویش پھیل گئی
امیتابھ بچن نے کہا کہ ان کا مقصد یہ بتانا تھا کہ جب کوئی چیمپیئن شکست سے دوچار ہوتا ہے تو اس کے بعد کی صورتحال سے نمٹنا سب سے مشکل مرحلہ ہوتا ہے۔
انہوں نے بتایا کہ ان کی تحریر کا تعلق فٹبال ورلڈ کپ 2026 کے فائنل میں ارجنٹینا کی اسپین کے ہاتھوں شکست اور ارجنٹینا کے کپتان لیونل میسی کے جذباتی ردعمل سے تھا۔
View this post on Instagram
امیتابھ بچن نے کہا کہ لوگوں نے سمجھ لیا کہ وہ اپنی ذات کے بارے میں لکھ رہے ہیں، حالانکہ ان کا اشارہ ایک چیمپیئن کی شکست کے بعد کی کیفیت کی طرف تھا۔
انہوں نے اپنی صحت کے بارے میں سوال کے جواب میں کہا کہ وہ بالکل ٹھیک ہیں۔
یہ بھی پڑھیں: فیفا ورلڈ کپ کا سحر، امیتابھ بچن بھی فٹبال کے دیوانے نکلے، نوجوان کھلاڑیوں کے نام جذباتی پیغام
واضح رہے کہ اسپین کے فٹبال عالمی کپ 2026 کے فائنل میں ارجنٹینا کو شکست دینے کے ایک روز بعد امیتابھ بچن نے ایک تحریر شیئر کی تھی جس میں انہوں نے سرجری، انتہائی نگہداشت اور صحتیابی کے مراحل کا ذکر کیا تھا، جس کے بعد مداحوں میں ان کی صحت سے متعلق تشویش پیدا ہوگئی تھی۔
کام کے حوالے سے امیتابھ بچن فلم کالکی 2898 اے ڈی کے دوسرے حصے میں اشوتھاما کے کردار میں واپس نظر آئیں گے، جبکہ وہ مقبول ٹی وی پروگرام کون بنے گا کروڑ پتی کے نئے سیزن کی میزبانی کے لیے بھی تیار ہیں۔
