وفاقی وزیر داخلہ محسن نقوی نے تربت میں فرنٹیئر کور (ایف سی) بلوچستان (ساؤتھ) ہیڈکوارٹرز کا دورہ کیا، جہاں انہوں نے جدید طبی سہولتوں سے آراستہ ایف سی اسپتال کا افتتاح کیا۔
اس موقع پر انہوں نے اسپتال کے مختلف شعبوں کا معائنہ کیا اور ڈاکٹروں، نرسوں اور پیرا میڈیکل عملے سے بھی ملاقات کی۔
وزیر داخلہ نے اسپتال کے او پی ڈی، مختلف وارڈز، ایم آر آئی، سی ٹی اسکین رومز اور آپریشن تھیٹر کا جائزہ لیا۔
اس موقع پر انہوں نے ڈاکٹروں، نرسز اور پیرا میڈیکل عملے سے ملاقات کی اور انہیں دکھی انسانیت کی بھرپور خدمت جاری رکھنے کی تلقین کی۔
محسن نقوی کو ایف سی اسپتال میں فراہم کی جانے والی جدید طبی سہولتوں کے بارے میں تفصیلی بریفنگ بھی دی گئی۔
یہ بھی پڑھیں: آئی جی ایف سی بلوچستان (ساؤتھ) کا پنجگور کا دورہ، گورنمنٹ ڈگری کالج چتکان کا تزئین کے بعد افتتاح
انہوں نے مختصر مدت میں اسپتال کی تعمیر مکمل کرکے اسے فعال بنانے پر آئی جی ایف سی بلوچستان (ساؤتھ) میجر جنرل بلال سرفراز خان اور ان کی ٹیم کی کارکردگی کو سراہا۔
وزیر داخلہ نے ایف سی اسپتال کو اتنا جلد فعال دیکھ کر خوشی کا اظہار کیا۔
انہوں نے کہا کہ تربت میں جدید طبی سہولتوں سے آراستہ اسپتال کی اشد ضرورت تھی اور اب اس سے نہ صرف ایف سی کے اہلکار بلکہ تربت اور گردونواح کی مقامی آبادی بھی معیاری علاج معالجے کی سہولت سے مستفید ہو سکے گی۔
دورے کے دوران آئی جی ایف سی میجر جنرل بلال سرفراز خان نے وزیر داخلہ کو فورس کی پیشہ ورانہ تربیت، آپریشنل تیاریوں اور فیلڈ آپریشنز کے بارے میں بھی بریفنگ دی۔
محسن نقوی نے ایف سی بلوچستان (ساؤتھ) کی پیشہ ورانہ صلاحیتوں اور آپریشنل تیاریوں کو سراہتے ہوئے دہشتگردی کے خلاف فورس کی خدمات کو خراج تحسین پیش کیا۔
انہوں نے کہا کہ فتنہ الہندوستان سمیت تمام کالعدم دہشتگرد تنظیموں کے خلاف کامیاب کارروائیاں ایف سی کے عزم، پیشہ ورانہ مہارت اور قربانیوں کا ثبوت ہیں۔
