کویت کے وزیر خارجہ شیخ جراح جابر الاحمد الصباح آج (28 جولائی) 2 روزہ سرکاری دورے پر پاکستان پہنچ رہے ہیں، جہاں وہ 29 جولائی تک مختلف اعلیٰ سطحی ملاقاتیں کریں گے۔
دفتر خارجہ کے مطابق یہ دورہ نائب وزیراعظم و وزیر خارجہ اسحاق ڈار کی دعوت پر کیا جا رہا ہے۔ دورے کے دوران دونوں وزرائے خارجہ کے درمیان وفود کی سطح پر مذاکرات بھی ہوں گے، جن میں پاکستان اور کویت کے دوطرفہ تعلقات، اقتصادی و تجارتی تعاون، سرمایہ کاری، باہمی شراکت داری اور مختلف شعبوں میں تعاون کے فروغ کا جائزہ لیا جائے گا۔
یہ بھی پڑھیں: کویتی وزیر خارجہ کا اسحاق ڈار سے ہنگامی رابطہ، قیام امن کے لیے اسلام آباد ایم او یو پر مکمل عملدرآمد کی اپیل
بیان کے مطابق ملاقاتوں میں مشرق وسطیٰ سمیت خطے کی مجموعی صورتحال، عالمی پیش رفت اور باہمی دلچسپی کے دیگر علاقائی و بین الاقوامی امور پر بھی تفصیلی تبادلہ خیال کیا جائے گا۔
دفتر خارجہ نے بتایا کہ شیخ جراح جابر الاحمد الصباح اپنے قیام کے دوران پاکستان کی اعلیٰ سیاسی قیادت سے بھی ملاقاتیں کریں گے، جن میں دوطرفہ تعلقات کو مزید مضبوط بنانے اور مختلف شعبوں میں تعاون کے نئے امکانات پر گفتگو ہوگی۔
🔈 PR No. 1️⃣9️⃣0️⃣/2️⃣0️⃣2️⃣6️⃣
Curtain Raiser: Visit of the Foreign Minister of the State of Kuwait to Pakistan (28–29 July 2026)
🔗⬇️ pic.twitter.com/xi5FJ70s2s
— Ministry of Foreign Affairs – Pakistan (@ForeignOfficePk) July 27, 2026
دفتر خارجہ کا کہنا ہے کہ یہ دورہ پاکستان اور کویت کے درمیان دیرینہ برادرانہ تعلقات کو مزید مستحکم بنانے، اقتصادی روابط کو وسعت دینے اور مشترکہ مفادات پر مبنی شراکت داری کو آگے بڑھانے کے دونوں ممالک کے عزم کا مظہر ہے۔
یہ بھی پڑھیے کویت نے پاکستان کے ساتھ دفاعی تعاون کے معاہدے کی منظوری دے دی
واضح رہے کہ رواں ماہ 18 جولائی کو نائب وزیراعظم و وزیر خارجہ اسحاق ڈار اور ان کے کویتی ہم منصب شیخ جراح جابر الاحمد الصباح کے درمیان ٹیلی فون پر بھی رابطہ ہوا تھا، جس میں خطے کی صورتحال اور دوطرفہ تعلقات پر تبادلہ خیال کیا گیا۔ اس موقع پر کویتی وزیر خارجہ نے علاقائی استحکام، امن کے فروغ اور مذاکرات کے ذریعے مسائل کے حل کے لیے پاکستان کے تعمیری اور مصالحتی کردار کو سراہا تھا۔
