گھر بیٹھے اکاؤنٹ، سرمایہ کاری اور منافع کی تفصیلات، ’نیشنل سیونگز‘ کی نئی ایپ لانچ

سینٹرل ڈائریکٹوریٹ آف نیشنل سیونگز نے اپنی خدمات کو جدید خطوط پر استوار کرتے ہوئے صارفین کے لیے ’نیشنل سیونگز ڈیجیٹل ایپ‘ متعارف کرا دی ہے، جس کے ذریعے متعدد مالیاتی خدمات اب دفاتر جائے بغیر موبائل فون پر حاصل کی جا سکیں گی۔

ادارے کے مطابق اس ڈیجیٹل پلیٹ فارم کا مقصد صارفین کو اپنے سرمایہ کاری اور مالی معاملات محفوظ، تیز اور آسان انداز میں کسی بھی وقت اور کسی بھی جگہ سے انجام دینے کی سہولت فراہم کرنا ہے، تاکہ انہیں نیشنل سیونگز کے مراکز کے بار بار چکر نہ لگانے پڑیں۔

ایپ پر دستیاب سہولیات

نیشنل سیونگز کی نئی ایپ کے ذریعے صارفین اپنے اکاؤنٹس کا بیلنس فوری طور پر چیک کر سکیں گے، ای اسٹیٹمنٹ حاصل کر سکیں گے اور اپنے تمام مالی لین دین کی مکمل تفصیلات اور ٹرانزیکشن ہسٹری بھی موبائل پر دیکھ سکیں گے۔

اس کے علاوہ صارفین گھر بیٹھے نیشنل سیونگز کی مختلف ڈیجیٹل سرمایہ کاری اسکیموں میں سرمایہ کاری کر سکیں گے، جبکہ اپنی مجموعی سرمایہ کاری اور اس پر حاصل ہونے والے منافع کی تازہ ترین معلومات بھی باآسانی حاصل کر سکیں گے۔

اینڈرائیڈ اور آئی فون صارفین کے لیے دستیاب

نیشنل سیونگز کا کہنا ہے کہ یہ موبائل ایپ اینڈرائیڈ صارفین کے لیے گوگل پلے اسٹور اور آئی فون استعمال کرنے والوں کے لیے ایپل ایپ اسٹور پر دستیاب ہے، جہاں سے اسے ڈاؤن لوڈ کیا جا سکتا ہے۔

رہنمائی کے لیے ہیلپ لائنز بھی جاری

صارفین کی سہولت کے لیے ادارے نے مختلف ہیلپ لائنز بھی فراہم کی ہیں۔ اے ٹی ایم سے متعلق معاونت کے لیے 268 267 111 51 92+ جبکہ موبائل ایپ سے متعلق رہنمائی کے لیے 464 728 111 51 92+ پر رابطہ کیا جا سکتا ہے۔

اس کے علاوہ صارفین سرکاری ویب سائٹ www.savings.gov.pk اور ای میل [email protected] کے ذریعے بھی معلومات اور معاونت حاصل کر سکتے ہیں۔

حکام نے بتایا ہے کہ جو صارفین ڈیجیٹل سروسز کے استعمال کے حوالے سے مزید رہنمائی چاہتے ہیں، وہ اپنے قریبی نیشنل سیونگز سینٹر سے بھی رجوع کر سکتے ہیں۔