وفاقی دارلحکومت اسلام آباد کی انتظامیہ نے احتجاج اور سیکیورٹی خدشات کے پیش نظر حفاظتی اقدامات سخت کر دیے ہیں اور شہر کے اہم داخلی اور خارجی راستوں پر ایک مرتبہ پھر کنٹینرز رکھ دیے گئے ہیں۔
یہ بھی پڑھیں:
حکام کے مطابق یہ اقدامات مختلف تنظیموں اور گروہوں کی جانب سے احتجاج کے اعلانات کے بعد امن و امان کی صورتحال برقرار رکھنے اور عوام کی حفاظت کے پیش نظر کیے گئے ہیں اور اسی سلسلے میں حساس مقامات پر پولیس اور قانون نافذ کرنے والے اداروں کی اضافی نفری بھی تعینات کر دی گئی ہے۔
شہر میں داخل ہونے والی گاڑیوں کی چیکنگ سخت کر دی گئی ہے جبکہ بعض علاقوں میں داخلے اور آمدورفت پر عارضی پابندیاں بھی عائد کی جا سکتی ہیں۔
اسی حوالے سے سیکٹر ایف 10 مرکز میں ایک اجتماع کے باعث اسلام آباد ٹریفک پولیس نے خصوصی ٹریفک پلان جاری کیا ہے تاکہ ٹریفک کی روانی برقرار رہ سکے۔
اسلام آباد پولیس کے مطابق ایف 10 مرکز جانے والے شہری نائنتھ ایوینیو کو متبادل راستے کے طور پر استعمال کرنے جبکہ پاکستان چوک سے ایف 10 مرکز آنے اور جانے والوں کو مارگلہ روڈ اختیار کرنے کی ہدایت کی گئی۔ اسی طرح حیدری چوک سے ای 11 جانے والی ٹریفک کو بھی مارگلہ روڈ استعمال کرنے جبکہ ایف 11 سے ایف 10 مرکز کی جانب ٹریفک کو جزوی طور پر متبادل راستوں پر چلانے کا انتظام کیا گیا۔
اسلام آباد ٹریفک پولیس نے شہریوں سے اپیل کی ہے کہ وہ غیر ضروری سفر سے گریز کریں، سفر سے قبل ٹریفک کی صورتحال معلوم کریں، متبادل راستے اختیار کریں اور ڈیوٹی پر موجود ٹریفک اہلکاروں کی ہدایات پر عمل کریں تاکہ ٹریفک کی روانی برقرار رہے اور شہریوں کو کم سے کم مشکلات کا سامنا کرنا پڑے۔
انتظامیہ کا کہنا ہے کہ سکیورٹی اور ٹریفک کی صورتحال کا مسلسل جائزہ لیا جا رہا ہے اور حالات کے مطابق ٹریفک پلان میں ضرورت پڑنے پر مزید تبدیلیاں بھی کی جا سکتی ہیں۔ شہریوں سے تعاون کی اپیل کی گئی ہے تاکہ حفاظتی انتظامات کو مؤثر بنایا جا سکے اور شہر میں امن و امان کی صورتحال برقرار رہے۔
دوسری طرف متعدد شاہراہوں پر جزوی اور مکمل بندش کے باعث شہریوں کو آمدورفت میں مشکلات کا سامنا ہے اور کئی علاقوں میں ٹریفک کی روانی متاثر ہونے کا امکان ظاہر کیا جا رہا ہے۔
