وفاقی وزیر برائے منصوبہ بندی، ترقی و خصوصی اقدامات احسن اقبال نے پاکستان کے 79ویں یومِ آزادی کے موقع پر نوجوانوں کے نام ایک ترغیبی نغمہ جاری کیا ہے، جو مصنوعی ذہانت کی مدد سے تیار کیا گیا ہے۔
نغمہ علامہ محمد اقبال کے فلسفۂ خودی اور شاہین کے تصور سے متاثر ہے اور اسے نوجوان نسل کے لیے خصوصی پیغام قرار دیا گیا ہے۔
یہ بھی پڑھیں: پاکستان کے 79ویں یوم آزادی پر جواد احمد کا ملی نغمہ جاری
سوشل میڈیا پلیٹ فارم ایکس پر اپنے پیغام میں احسن اقبال نے کہا کہ پاکستان کے نوجوان ہی ملک کے مستقبل کے معمار ہیں، اسی لیے یہ نغمہ ان کے نام منسوب کیا گیا ہے۔
انہوں نے کہا کہ علامہ اقبال نے قوموں کی ترقی کا راز نوجوانوں کے اعتماد، مضبوط کردار، علم اور اپنی صلاحیتوں پر غیرمتزلزل یقین میں پوشیدہ قرار دیا تھا۔
My dear young Pakistanis,
As we celebrate the 79th Independence Day of our beloved homeland, I am delighted to launch this inspirational song dedicated to the youth of Pakistan—the architects of our nation’s future.
Inspired by the timeless philosophy of Allama Muhammad Iqbal,… pic.twitter.com/Jz9Dgvwm8L— Ahsan Iqbal (@betterpakistan) August 3, 2026
وزیر منصوبہ بندی نے اپنے پیغام میں علامہ اقبال کا خودی سے متعلق معروف شعر نقل کرتے ہوئے کہا کہ یہی فلسفہ نوجوانوں کو اپنی صلاحیتوں کو پہچاننے اور انہیں بروئے کار لانے کی ترغیب دیتا ہے۔
انہوں نے اقبال کے تصورِ شاہین کا حوالہ دیتے ہوئے کہا کہ شاہین بے خوف، بلند حوصلہ اور آزادی کی علامت ہے، جو کبھی معمولی معیار پر اکتفا نہیں کرتا بلکہ ہمیشہ بلند منزلوں کی جانب پرواز کرتا ہے۔
مزید پڑھیں: پاک چین 75 سالہ دوستی پر خصوصی پشتو نغمہ 20 مئی کو ریلیز ہوگا
اس ضمن میں انہوں نے اقبال کا شعر ’تو شاہیں ہے، پرواز ہے کام تیرا، ترے سامنے آسماں اور بھی ہیں‘ بھی اپنے پیغام کا حصہ بنایا۔
’آج پاکستان کو ایسے نوجوانوں کی ضرورت ہے جو مایوسی کے بجائے امید، جمود کے بجائے جدت اور بہانوں کے بجائے محنت کا راستہ اختیار کریں۔‘
مزید پڑھیں: یومِ آزادی معرکہ حق کا جوشیلہ ملی نغمہ ’منہ توڑ‘ جاری
احسن اقبال کے مطابق حکومت ’اڑان پاکستان‘ کے وژن کے تحت ایسا مستقبل تشکیل دے رہی ہے جو علم، ٹیکنالوجی، اختراع، کاروباری مواقع اور نوجوانوں کی صلاحیتوں پر استوار ہوگا۔
انہوں نے امید ظاہر کی کہ یہ نغمہ نوجوانوں میں خودی کی طاقت بیدار کرنے، شاہین کی مانند بلند پرواز کا جذبہ پیدا کرنے اور ایک مضبوط، خوشحال اور متحد پاکستان کی تعمیر میں اپنا کردار ادا کرنے کی ترغیب دے گا۔
