پاکستان اور چین کے درمیان سفارتی تعلقات کے 75 سال مکمل ہونے کے موقعے پر پشاور میں قائم چائنا ونڈو ثقافتی مرکز نے ایک خصوصی پشتو گانا تیار کیا ہے جسے باضابطہ طور پر 20 مئی کو اسلام آباد میں جاری کیا جائے گا۔
یہ بھی پڑھیں: پاک چین دوستی کے 75 سال مکمل، سی پیک تعاون سے معیشت اور ترقی کے نئے در وا
یہ گانا معروف شاعر پروفیسر ڈاکٹر اباسین یوسفزئی نے تحریر کیا ہے اور اسے 2 ممالک کے دیرینہ اور مستحکم تعلقات کے جشن کے طور پر ایک لازوال شاعری کا نمونہ قرار دیا گیا ہے۔
گانے کی ہدایتکاری ممتاز صحافی اور چائنا ونڈو کے منتظم امجد عزیز ملک نے کی ہے جبکہ موسیقی خیبر پختونخوا کے معروف موسیقار گوہر جان نے ترتیب دی ہے۔
بین الاقوامی شہرت یافتہ گلوکار ڈاکٹر عرفان خلیل اور یمسا نور نے اپنی آوازیں اس تخلیق میں شامل کی ہیں جس سے گانے کو جذباتی اور گہرا رنگ ملا ہے۔
مزید پڑھیے: صدر آصف زرداری کا نئے چینی سال پر پیغام، پاک چین دوستی فولادی قرار
موسیقی ویڈیو کی شوٹنگ تاریخی مقام تختِ بہی میں کی گئی جو قدیم گندھارا تہذیب کا حصہ ہے اور چین سے ثقافتی اور تاریخی تعلق رکھتا ہے۔
اضافی مناظر پشاور کے ایک 142 سالہ روایتی مکان میں فلمائے گئے جو 7 دہائیوں پر محیط دوستی کی مضبوطی اور تسلسل کی علامت ہیں۔
گانے کے بول ایک شاعرانہ کہانی بیان کرتے ہیں جس میں ایک لڑکی پاکستانی نوجوان کو شہزادے کے روپ میں دیکھتی ہے جبکہ نوجوان اسے چین کی پری کے طور پر بیان کرتا ہے اور دونوں اپنے جذبات اور باہمی تعلق کو خوبصورت استعاروں کے ذریعے ظاہر کرتے ہیں۔
مزید پڑھیں: وزیراعلیٰ پنجاب سے چینی قونصل جنرل کی ملاقات، پاک چین تعلقات اور اقتصادی تعاون پر تبادلہ خیال
اس خصوصی گانے کی باضابطہ تقریب 20 مئی کو اسلام آباد میں منعقد ہوگی جس میں خیبر پختونخوا، وفاقی دارالحکومت اور چینی سفارتخانے کے معزز شخصیات شرکت کریں گی۔
