امریکا کی 25 ریاستوں اور دولتِ مشترکہ کے علاقوں پر مشتمل اتحاد نے صدر ڈونلڈ ٹرمپ کی انتظامیہ کے مجوزہ 10 سے 12.5 فیصد عالمی درآمدی ٹیرف کے خلاف امریکی عدالت برائے بین الاقوامی تجارت میں مقدمہ دائر کر دیا ہے۔
ریاستوں کا مؤقف ہے کہ امریکی تجارتی نمائندے کے دفتر نے جبری مشقت کے معاملے پر کی گئی تحقیقات کو محض قانونی جواز کے طور پر استعمال کرتے ہوئے وہ تجارتی پابندیاں دوبارہ نافذ کرنے کی کوشش کی ہے جنہیں وفاقی عدالتیں پہلے ہی مسترد کر چکی ہیں۔
یہ بھی پڑھیں: صدر ٹرمپ کا چین پر ٹیرف میں کمی کا عندیہ، امریکی ریاستوں کا عدالت سے رجوع
درخواست میں کہا گیا ہے کہ یو ایس ٹی آر نے صرف ڈھائی ماہ میں 60 معیشتوں کی تحقیقات مکمل کیں، حالانکہ اس نوعیت کی تحقیقات میں عموماً ایک سال سے زیادہ وقت درکار ہوتا ہے۔
ریاستوں کے مطابق انتظامیہ نے پہلے ہی ٹیرف نافذ کرنے کا فیصلہ کر رکھا تھا، کیونکہ خام مال اور تیار شدہ مصنوعات پر یکساں ٹیرف عائد کیا گیا ہے، بغیر اس کے کہ مختلف ممالک میں جبری مشقت کی صورتحال کا الگ الگ جائزہ لیا جائے۔
A coalition of 25 Democratic-led states sued the Trump administration Monday, arguing President Donald Trump exceeded his authority by imposing sweeping tariffs on goods from 60 U.S. trading partners.
The complaint, filed in the U.S. Court of International Trade, challenges… pic.twitter.com/yrmHf1Ig63
— CNBC (@CNBC) August 3, 2026
نیویارک کی اٹارنی جنرل لیٹیشیا جیمز نے کہا کہ امریکی آئین کے مطابق صدر کو اپنی مرضی سے کسی بھی ملک پر وسیع پیمانے پر ٹیرف عائد کرنے کا اختیار حاصل نہیں۔
نیویارک کی گورنر کیتھی ہوکُل نے ان اقدامات کو ’محنت کش خاندانوں پر ٹیکس‘ قرار دیتے ہوئے کہا کہ اس سے اشیائے خور و نوش اور تعمیراتی سامان کی قیمتوں میں اضافہ ہوگا۔
درخواست گزاروں نے مؤقف اختیار کیا کہ ٹرمپ انتظامیہ نے ٹریڈ ایکٹ کی دفعہ 301 کے تحت عالمی ٹیرف نافذ کرنے کی تیسری کوشش بھی غیر قانونی ہے۔
مزید پڑھیں: سپریم کورٹ کے فیصلے کے بعد ٹرمپ کا نیا حربہ، عالمی درآمدات پر نئے ٹیرف کا نفاذ
ان کے مطابق انتظامیہ کے اقدامات من مانی، قانون کے منافی اور آئین کی خلاف ورزی ہیں، کیونکہ ٹیکس عائد کرنے کا اختیار صرف کانگریس کے پاس ہے۔
ریاستوں نے عدالت سے استدعا کی ہے کہ ان ٹیرف کو غیر قانونی قرار دے کر کالعدم کیا جائے۔
دوسری جانب وائٹ ہاؤس نے مقدمے کو مسترد کرتے ہوئے کہا ہے کہ انتظامیہ قانون کے مطابق اختیارات استعمال کر رہی ہے۔
مزید پڑھیں: امریکی تجارتی عدالت نے ٹرمپ کے 10 فیصد عالمی ٹیرف مسترد کر دیے
وائٹ ہاؤس کے ترجمان کش دیسائی کے مطابق امریکا ایسے غیر منصفانہ اقدامات، پالیسیوں اور طریقوں کے خاتمے کے لیے قانونی اختیار استعمال کر رہا ہے جو امریکی تجارت کو نقصان پہنچاتے ہیں۔
ان کا کہنا تھا کہ لیبر قوانین پر عمل درآمد میں غیر ملکی ناکامی امریکی کارکنوں کے مفادات کو متاثر کرتی ہے، جبکہ سیکشن 301 کے تحت ٹیرف امریکی تجارتی پالیسی کا مؤثر اور قانونی ذریعہ رہے ہیں۔
