یومِ استحصالِ کشمیر کے موقع پر دفتر خارجہ نے کہا ہے کہ پاکستان 5 اگست 2019 کو بھارت کے غیر قانونی اور یکطرفہ اقدامات کی 7ویں برسی پر مقبوضہ جموں و کشمیر کی بین الاقوامی سطح پر تسلیم شدہ متنازع حیثیت تبدیل کرنے کی کوشش کی مذمت کرتا ہے۔
دفتر خارجہ کے ترجمان کی جانب سے جاری بیان میں کہا گیا کہ پاکستان بھارت کے غیر قانونی زیرِ تسلط جموں و کشمیر (IIOJK) کے عوام کی جرات، ثابت قدمی اور غیر متزلزل عزم کو خراجِ تحسین پیش کرتا ہے۔
مزید پڑھیں:یومِ استحصالِ کشمیر: صدر اور وزیراعظم کا کشمیری عوام کی بھرپور حمایت کا اعلان
بیان میں کہا گیا کہ پاکستان جموں و کشمیر کے عوام کے حقِ خودارادیت کی منصفانہ جدوجہد کی بھرپور حمایت جاری رکھے گا۔ یہ حق اقوام متحدہ کی سلامتی کونسل کی متعلقہ قراردادوں میں تسلیم شدہ ہے۔
دفتر خارجہ نے اس عزم کا اعادہ کیا کہ پاکستان کشمیری عوام کی جائز جدوجہد کی سیاسی، سفارتی اور اخلاقی حمایت جاری رکھے گا اور مسئلہ کشمیر کے اقوام متحدہ کی قراردادوں کے مطابق حل پر زور دیتا رہے گا۔
