معروف پاکستانی ٹی وی اداکارہ نمرہ خان نے سوشل میڈیا پر گردش کرنے والی اپنی طلاق کی افواہوں کی تردید کرتے ہوئے واضح کیا ہے کہ ان کی ازدواجی زندگی خوشگوار ہے اور طلاق کی خبریں بے بنیاد ہیں۔
حال ہی میں مداحوں نے دیکھا کہ اداکارہ کی انسٹاگرام پروفائل سے شادی کی تصاویر غائب ہیں جس کے بعد مختلف سوشل میڈیا پلیٹ فارمز پر ان کی علیحدگی اور طلاق سے متعلق قیاس آرائیاں شروع ہو گئیں۔
View this post on Instagram
اسی دوران نمرہ خان نے انسٹاگرام پر ایک جذباتی ویڈیو بھی شیئر کی جس میں ایک وائس اوور کے ذریعے یہ پیغام دیا گیا تھا کہ مشکل حالات میں انسان کو خود اپنا سہارا بننا چاہیے کیونکہ آخرکار وہی اپنے لیے سب سے مضبوط سہارا ہوتا ہے۔ اس ویڈیو نے بھی افواہوں کو مزید ہوا دی۔
ویڈیو کے کمنٹ سیکشن میں ایک مداح نے سوال کیا کہ ’امید ہے سب خیریت ہوگی، آپ نے اپنی شادی کی تصاویر بھی ڈیلیٹ کر دی ہیں‘۔ اس پر نمرہ خان نے خود جواب دیتے ہوئے تمام افواہوں کی تردید کر دی۔ انہوں نے لکھا ’سب بالکل ٹھیک ہے۔ تصاویر انسٹاگرام سے حذف نہیں کیں صرف نظرِ بد سے بچنے کے لیے انہیں آرکائیو کیا ہے۔ دعا کرنے کا بہت شکریہ‘۔
اداکارہ کی اس وضاحت کے بعد ان کی طلاق سے متعلق گردش کرنے والی افواہیں دم توڑ گئیں جبکہ مداحوں نے بھی ان کے لیے نیک خواہشات اور دعاؤں کا اظہار کیا۔
یاد رہے کہ نمرہ خان نے جون 2026 میں فرانس کے دارالحکومت پیرس میں اپنی شادی کا اعلان کیا تھا۔ انہوں نے نکاح کی خوبصورت تصاویر اور ویڈیوز بھی مداحوں کے ساتھ شیئر کی تھیں، جنہیں سوشل میڈیا پر خوب پسند کیا گیا۔
