وزیراعظم محمد شہباز شریف سے پاکستان میں تعینات چین کے سفیر جیانگ زیڈونگ نے وزیراعظم ہاؤس میں ملاقات کی جس میں دوطرفہ تعلقات، باہمی تعاون اور علاقائی امور پر تبادلہ خیال کیا گیا۔
یہ بھی پڑھیں: وزیراعظم شہباز شریف سعودی عرب روانہ، سعودی ولی عہد و وزیراعظم شہزادہ محمد بن سلمان بن عبدالعزیز آل سعود سے اہم ملاقات کریں گے
ملاقات کے دوران چینی سفیر نے وزیراعظم کو چین کے صدر شی جن پنگ کا خط پیش کیا جس میں کمیونسٹ پارٹی آف چائنا کے قیام کی 105ویں سالگرہ کے موقع پر وزیراعظم شہباز شریف کی جانب سے بھیجے گئے تہنیتی خط پر اظہار تشکر کیا گیا۔
وزیراعظم نے پاکستان اور چین کے درمیان دوستانہ تعلقات میں ہونے والی مثبت پیشرفت کو سراہتے ہوئے چین کے ساتھ آل ویدر اسٹریٹیجک شراکت داری کو مزید مضبوط بنانے کے پاکستان کے عزم کا اعادہ کیا۔
انہوں نے دونوں ممالک کے عوام کے درمیان روابط بڑھانے کے ساتھ ساتھ سیاسی جماعتوں اور پارلیمانوں کے مابین تبادلوں کی اہمیت پر بھی زور دیا اور کہا کہ ایسے روابط دوطرفہ تعلقات کو مزید مستحکم بنانے میں اہم کردار ادا کرتے ہیں۔
مزید پڑھیے: بجلی تقسیم کار کمپنیوں کی نجکاری مقررہ مدت میں مکمل کی جائے، وزیراعظم شہباز شریف کی ہدایت
ملاقات میں پاکستان اور چین کے درمیان باہمی تعاون کے مختلف شعبوں اور باہمی دلچسپی کے علاقائی امور پر بھی تفصیلی تبادلہ خیال کیا گیا۔
