اسپیکر قومی اسمبلی سردار ایاز صادق نے دستور ساز اسمبلی کی 79ویں سالگرہ پر اپنے پیغام میں کہا ہے کہ 10 اگست 1947 پاکستان کے آئینی و پارلیمانی سفر کے آغاز کا تاریخی دن تھا۔
انہوں نے کہا کہ دستور ساز اسمبلی کا پہلا اجلاس بانیانِ پاکستان کے جمہوری وژن کی عملی تعبیر تھا، جس نے ملک میں آئینی، جمہوری اور پارلیمانی نظام کی بنیاد رکھی۔
مزید پڑھیں:اسپیکر سردار ایاز صادق کی اصلاحاتی پالیسیوں سے قومی اسمبلی کے اخراجات میں نمایاں کمی
سردار ایاز صادق نے کہا کہ پارلیمانی جمہوریت ریاست پاکستان کی اساس ہے، جبکہ آئین کی بالادستی، قانون کی حکمرانی اور جمہوری عمل کا تسلسل مستحکم پاکستان کی ضمانت ہے۔
اسپیکر قومی اسمبلی کے مطابق عوام دوست اور مؤثر قانون سازی کے ذریعے عوامی مسائل کے حل کو یقینی بنایا جاسکتا ہے، جبکہ مضبوط پارلیمان قومی استحکام اور ملکی ترقی کی بنیاد ہے۔
انہوں نے تمام سیاسی قوتوں پر زور دیا کہ قومی مفاد کو مقدم رکھتے ہوئے مکالمے اور اتفاقِ رائے کو فروغ دیں، کیونکہ پارلیمان عوام کی امنگوں کی ترجمان اور اجتماعی آواز ہے۔
مزید پڑھیں:10 مئی ملکی تاریخ کا روشن اور یادگار دن ہے، اسپیکر قومی اسمبلی سردار ایاز صادق
سردار ایاز صادق نے کہا کہ نوجوانوں کو آئینی ارتقا، پارلیمانی تاریخ اور جمہوری روایات سے روشناس کرانا ضروری ہے۔ قومی اسمبلی میں مصنوعی ذہانت اور جدید ڈیجیٹل نظام متعارف کرائے جارہے ہیں، جبکہ اسمبلی کا انٹرن شپ پروگرام نوجوانوں میں جمہوری شعور اجاگر کرنے میں اہم کردار ادا کررہا ہے۔
انہوں نے عزم ظاہر کیا کہ پارلیمان آئین کی بالادستی، جمہوری اقدار کے فروغ اور قانون کی حکمرانی کے لیے اپنا کردار جاری رکھے گی۔
