عمران خان کی طبیعت بالکل ٹھیک، بیرسٹر گوہر کی ان سے ملاقات بھی ہوئی ہے، سلیم مانڈوی والا کا انکشاف

پاکستان پیپلز پارٹی (پی پی پی) کے سینیئر رہنما سلیم مانڈوی والا نے انکشاف کیا ہے کہ عمران خان کی طبیعت بالکل ٹھیک ہے اور بیرسٹر گوہر کی ان سے ملاقات بھی ہوئی ہے۔

میڈیا سے گفتگو کرتے ہوئے انہوں نے کہاکہ جس طرح سہیل آفریدی میڈیا پر آنا شروع ہوئے ہیں اور لانگ مارچ کی کال بھی دی ہے، اس سے متعلق انہیں کسی ڈیل یا معاملات طے پانے کی کوئی معلومات نہیں۔

بریکنگ نیوز: ،سلیم مانڈوی والا بڑا انکشاف

عمران خان کی صحت کے حوالے سے جو خبریں چل وہ غلط ہیں، کیونکہ کل میں ایک جگہ تھا تو انہوں نے مجھے بتایا کہ بیرسٹر گوہر عمران خان سے مل کر آئیں ہیں@BarristerGohar @SenatorSaleem pic.twitter.com/doGFPNzYaM

— Shehzad nawaz (@sknawaz478) August 12, 2026

انہوں نے کہاکہ انہیں اس حوالے سے کوئی علم نہیں، کبھی معاملات بنتے ہیں اور میرے خیال میں کبھی نہیں بنتے۔

عمران خان کی صحت کے حوالے سے چلنے والی خبروں پر بات کرتے ہوئے سلیم مانڈوی والا نے کہاکہ انہیں لگتا ہے کہ یہ خبریں بھی غلط ہیں۔

انہوں نے کہاکہ کل وہ کہیں موجود تھے تو وہاں انہیں بتایا گیا کہ بیرسٹر گوہر عمران خان سے مل کر آئے ہیں۔

سلیم مانڈوی والا سے جب پوچھا گیا کہ کیا بیرسٹر گوہر کی عمران خان سے ملاقات ہوئی ہے تو انہوں نے کہاکہ انہیں کسی نے بتایا ہے کہ عمران خان سے ملاقات ہوئی ہے، تاہم انہیں اس بارے میں خود علم نہیں۔

واضح رہے کہ پاکستان تحریک انصاف (پی ٹی آئی) کا کہنا ہے کہ انہیں عمران خان کے صحت کے حوالے سے تحفظات ہیں، اس لیے ان کے اہلخانہ کی موجودگی میں ان کا علاج کرایا جائے۔

دوسری جانب وزیراعلیٰ خیبرپختونخوا سہیل آفریدی نے 27 ستمبر کو اسلام آباد کی جانب مارچ کی کال بھی دی ہے، اور ان کا مؤقف ہے کہ ہم عمران خان تک رسائی چاہتے ہیں۔ ’سہیل آفریدی وزیراعلیٰ بننے کے بعد اب تک بانی پی ٹی آئی سے ملاقات نہیں کر سکے۔‘