نجکاری کمیشن پاکستان نے عوام کو خبردار کیا ہے کہ وزیراعظم کے معاون برائے نجکاری اور نجکاری کمیشن کے چیئرمین محمد علی کے نام سے سوشل میڈیا پلیٹ فارمز بشمول واٹس ایپ اور فیس بک پر جعلی پروفائلز اور غیر مجاز اکاؤنٹس کے ذریعے فراڈ کی کوششیں کی جا رہی ہیں۔
یہ بھی پڑھیں: نوسرباز آپ کی آواز چرا سکتے ہیں لیکن ایک راز نہیں جان سکتے، جانیے اے آئی فراڈ سے بچنے کا مؤثر طریقہ
نجکاری کمیشن کے ترجمان کی جانب سے جاری بیان میں کہا گیا ہے کہ بعض شرپسند عناصر محمد علی کی تصاویر، نام اور رابطہ معلومات کا غیر قانونی استعمال کرتے ہوئے شہریوں سے رقم بٹورنے یا حساس ذاتی معلومات حاصل کرنے کی کوشش کر رہے ہیں۔
ترجمان نے عوام سے اپیل کی ہے کہ وہ ایسے کسی بھی پیغام، فون کال یا سوشل میڈیا پروفائل پر اعتماد نہ کریں جو غیر مصدقہ نمبروں یا جعلی اکاؤنٹس کے ذریعے محمد علی کی نمائندگی کا دعویٰ کرے۔
مزید پڑھیے: واٹس ایپ صارفین کو نوسربازوں سے بچانے کے لیے میٹا کی منصوبہ بندی
عوام کو ہدایت کی گئی ہے کہ وہ کسی بھی غیر تصدیق شدہ اکاؤنٹ کے ساتھ اپنی ذاتی معلومات، بینکنگ تفصیلات، پاس ورڈز، ون ٹائم پاس ورڈز (او ٹی پی) یا شناختی دستاویزات شیئر نہ کریں اور نہ ہی کسی قسم کی رقم منتقل کریں۔
نجکاری کمیشن نے کہا کہ اگر کسی شہری سے کسی جعلی پروفائل کے ذریعے رابطہ کیا جائے تو فوری طور پر اس اکاؤنٹ کو بلاک کیا جائے، متعلقہ سوشل میڈیا پلیٹ فارم پر رپورٹ کیا جائے اور مزید رابطے سے گریز کیا جائے۔
بیان میں کہا گیا ہے کہ معاملہ متعلقہ حکام اور سائبر کرائم اداروں کو رپورٹ کیا جا رہا ہے تاکہ ملوث افراد کے خلاف قانونی کارروائی عمل میں لائی جا سکے۔
مزید پڑھیں: لاہور میں نوسرباز دَم کرنے کے بہانے بھاری مالیت کا سونا اور نقدی لے اُڑا
نجکاری کمیشن نے یہ انتباہ عوامی مفاد میں جاری کیا ہے اور شہریوں پر زور دیا ہے کہ وہ آن لائن فراڈ سے بچنے کے لیے احتیاطی تدابیر اختیار کریں۔
