وزیر دفاع خواجہ محمد آصف نے کہا ہے کہ نئے انتظامی یونٹس کے قیام کے معاملے پر آئندہ انتخابات کا انتظار کرنے کی ضرورت نہیں، یہ معاملہ اگلے انتخابات سے پہلے ہی حل کرلیا جائےگا۔
نجی ٹی وی سے گفتگو کرتے ہوئے خواجہ محمد آصف نے کہاکہ یہ ایک تعمیری بحث ہے جس کا کوئی نہ کوئی نتیجہ ضرور نکلنا چاہیے۔ اگر اختیارات کا کچھ حصہ انتظامی یونٹس یا اضلاع کو منتقل کردیا جائے اور نئے انتظامی یونٹس وجود میں آجائیں تو اس میں کیا حرج ہے؟
BREAKING
نئے انتظامی یونٹس کے قیام کے معاملے پر آئندہ الیکشن کا انتظار نہیں کرنا پڑے گا، یہ معاملہ آئندہ انتخابات سے پہلے ہی طے ہو جائے گا۔۔ یہ ایک تعمیری بحث ہے جس کا کوئی نا کوئی نتیجہ نکلنا چاہیے۔ اگر طاقت کا کچھ حصہ انتظامی یونٹس کو یا اضلاع کو جائے اور نئے انتظامی یونٹس… pic.twitter.com/Hdzn4etGEc— Asma Shirazi (@asmashirazi) August 19, 2026
وزیر دفاع نے کہاکہ اس وقت عوام کے لیے سروس ڈیلیوری کے نظام کو بہتر بنانے کی ضرورت ہے، پورے پاکستان کے عوام کو شکایات ہیں۔
انہوں نے کہاکہ ہمیں سیاسی مصلحت کی وجہ سے اس معاملے میں رکاوٹ نہیں بننا چاہیے۔
واضح رہے کہ کچھ عرصے سے پاکستان میں نئے انتظامی یونٹس کے قیام کی بحث جاری ہے، جس میں اب شدت آ گئی ہے۔ تاہم، ملک کی دو بڑی سیاسی جماعتیں مسلم لیگ (ن) اور پیپلز پارٹی اس کے خلاف ہیں۔
پیپلز پارٹی کا مؤقف ہے کہ کچھ بھی ہو جائے سندھ کو تقسیم نہیں ہونے دیا جائےگا، جبکہ مسلم لیگ ن پنجاب کی تقسیم کے خلاف ہے۔
دوسری جانب ایم کیو ایم ملک میں نئے صوبوں کا مطالبہ کررہی ہے، جبکہ حال ہی میں وفاقی وزیر داخلہ محسن نقوی نے ایک تقریب سے خطاب کرتے ہوئے کہاکہ موجودہ سسٹم ناکام ہو چکا ہے، ہمیں نئے انتظامی یونٹس کی طرف جانا ہوگا۔
